Denîz Unda û Waldemar Anton /Wêne: Reuters
Hewlêr (Rûdaw) - Di maça Lîga Almanyayê (Bundesliga) de, VfB Stuttgart li deplasmanê bi saya 3 golên lîstikvanê Kurd Denîz Undav li hemberî Borussia Dortmundê 3-3 wekî hev ma.
Undav di dema zêdekirî ya maçê de gola wekheviyê tomar kir û tîma xwe ji têkçûnê rizgar kir.
Maç li Stadyuma Signal Iduna Parkê ya Dortmundê hat lîstin û ji ber ku her du tîm di rêzbendiya lîgê de nêzîkî hev bûn, pêşbirkeke bi kelecan derket holê.
Dortmundê bi golên Emre Can (xuleka 34an ji penaltiyê) û Maximilian Beier (xuleka 41ê) nîvê yekem 2-0 li pêş qedand.
Vegera Stuttgartê bi saya Denîzê Kurd
Stuttgart di nîvê duyem de bi saya Denîz Undav bi hêz vegeriya.
Undav xuleka 47an gola yekem û xuleka 71ê de jî gola wekheviyê tomar kir û skor bû 2-2.
Dortmund xuleka 89an bi gola Karim Adeyemi careke din ket pêş û skor bû 3-2.
Dema ku dihat payîn maç bi vî awayî bi dawî bibe, Denîzê Kurd xuleka 90+1ê de derket ser dikê û bi gola xwe ya sêyem encam diyar kir: 3-3.
Denîz Undav bû Lîstikvanê Maçê
Denîz Undav ji ber performansa xwe ya bilind wekî 'Lîstikvanê Maçê' hat hilbijartin.
Ev duyemîn hat-tricka Undav a di kariyera wî ya Bundesligayê de bû.
Her çend penaltiya ku bû sedema gola yekem a Dortmundê wî kiribe jî, wî bi 3 golên xwe xeletiya xwe telafî kir û puenekî zêrîn ji tîma xwe re anî.
Stuttgart di hefteya 11an an Bundesligayê de bi 22 puanan di rêza 5an de cih digire.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse