Hewlêr (Rûdaw) - Endamê Kongreya Amerîkayê Joe Wilson pêşnûmayeke sererastkirinê ji bo Yasaya Bûdceya Parastina Neteweyî (NDAA) pêşkêş kir û tê de tekezî li ser piştgiriya Amerîkayê ya ji bo Hikûmeta Herêma Kurdistanê dike.
Pêşnûma wekî sererastkirineke ji bo benda 12an a pêşnûmayasaya parastinê hatiye pêşkêşkirin û Hikûmeta Herêma Kurdistanê wekî "hevpareke girîng ê stratejîk ê Amerîkayê" bi nav dike.
Banga li hikûmeta Îraqê
Wilson daxwazê ji hikûmeta Îraqê dike ku dev ji neşandina mûçeyên karmendên Hikûmeta Herêma Kurdistanê berde, dawî li rawestandina hinardekirina petrol û gaza Herêma Kurdistanê bîne û êrişên komên çekdar ên li Herêma Kurdistanê rawestîne.
"Amerîka piştgiriyê dide Hikûmeta Herêma Kurdistanê"
Joe Wilsonê ku endamê Komariyan e got, "Amerîka piştgiriyê dide dabînkirina tedbîrên ewlehiyê yên pêwîst ji bo Hikûmeta Herêma Kurdistanê da ku Hikûmeta Herêma Kurdistanê bikaribe bergiriyê li xwe bike li hemberî êrişên Îranê û mîlîsên girêdayî wê yên li dijî Hikûmeta Herêma Kurdistanê û çavkaniyên wê yên enerjiyê."
"Hevparê giring ê stratejîk"
Wilsonê ku du kurên wî li Îraqê xizmet kirine, her wiha got:
"Ez kêfxweş im ku piştgiriyê didim vê sererastkirina Yasaya Bûdceya Parastina Neteweyî ya ji bo piştgirîkirina Hikûmeta Herêma Kurdistana Îraqê wekî hevparekî girîng ê stratejîk ê Amerîkayê."
Yasaya Parastina Neteweyî, yasayeke salane ya Amerîkayê ye ku siyaseta parastinê ya welêt diyar dike û xerciyên Wezareta Parastinê pesend dike.
Ev yasa çarçoveyeke yasayî ji bo bernameyên leşkerî, hevkariyên derve û destpêşxeriyên ewlehiyê dabîn dike.
Her sal, endamên Kongresê dikarin ji bo bendên pêşnûmayasayê sererastkirinan pêşniyar bikin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse