Dusseldorf (Rûdaw) - Hikûmeta Yunanistanê yasayeke nû ya li dijî koçberan qebûl kir û li gorî wê, her koçberê ku bi awayekî neyasayî bigihêje wî welatî yekser dê were desteserkirin û dibe ku heta 5 salan cezayê girtîgehê lê were birîn.
Her wiha serlêdanên penaberiyê heta 3 mehan hatin rawestandin û heta niha zêdetirî 190 kesî hatine desteserkirin.
Yasaya nû di rûniştina 11ê vê mehê de li Parlamentoya Yunanistanê hat qebûlkirin û vê hefteyê kete meriyetê.
Li gorî yasayê, heta 3 mehan ti serlêdanên penaberiyê ji koçberan nayên wergirtin.
Gelek koçber ji bo ku neyên desteserkirin û dersînorkirin, daxwaza mafê penaberiyê dikin.
Bi vê yekê, Yunanistan li gorî yasayên Yekîtiya Ewropayê neçar dimîne ku wan dersînor neke û wekî penaxwaz miameleyê bi wan re bike.
Armanca yasaya nû ew e ku rê li ber vê yekê bigire.
Ev biryar li ser asta navneteweyî û di nava Yunanistanê bi xwe de jî rastî rexneyên tund hat.
Rêxistina Penaberan a Neteweyên Yekbûyî (NY), Konseya Yekîtiya Ewropayê û rêxistinên wekî Amnesty Internationalê jî dibêjin ku biryar li dijî yasayên Yekîtiya Ewropayê û peymanên parastina mafên koçberan e.
Li parlamentoyê, partiyên mixalefetê bi 74 dengan li hemberî 177 dengan li dijî yasayê deng da û ji bo betalkirina wê dest bi kampanyayekê kir.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse