چەند پارچە زێڕ و زیوێک
رووداو دیجیتاڵ
راوێژکارێکی دارایی دەڵێ، ئێستا کاتێکی گونجاوە بۆ کڕینی زێڕ، بەڵام باشترە لە چەند نرخێکی جیاوازدا بکڕدرێ.
هەفتەی رابردوو هەفتەیەکی پڕ ناجێگیری بوو بۆ بازاڕە داراییەکانی جیهان.
بەرەبەیانیی رۆژی شەممە، 7ـی شوباتی 2026، لەکاتی داخرانی بازاڕەکانی جیهاندا ئۆنسەیەک زێڕ 3.98٪ یان 189 دۆلار بەرزبووەوە و بە 4,964 دۆلار مامەڵەی پێوەکرا.
لەم هەفتەیەدا نزمترین ئاستی نرخی ئۆنسەیەک زێڕ 4,404.12 دۆلار و بەرزترین ئاستیشی 5,092.68 دۆلار بوو.
بەڵام رۆژی پێنجشەممە، زێڕ نەیتوانی ئاستی پشتیوانیی 5,000 دۆلار بۆ هەر ئۆنسەیەک بپارێزێ و دابەزی بۆ خوار ئەو ئاستە.
هاوکات نرخی ئۆنسەیەک زیو 10٪ یان 7.14 دۆلار بەرزبووەوە و گەیشتە 77.50 دۆلار.
رۆژی چوارشەممەش ئۆنسەیەک زیو گەیشتە زیاتر لە 92 دۆلار، بەڵام بەیانیی دوێنێ هەینی ئاستی 66 دۆلاری تۆمارکرد.
د. شکار هەڵەبجەیی، راوێژکاری دارایی و پسپۆڕی بانکی ئیسلامی و بازاڕە داراییەکان ئاماژە بەوە دەکات، بازاڕی زیو لەژێر کاریگەریی خواستێکی "فیزیکی"ی گەورەدایە و دراوە دیجیتاڵییەکانیش قۆناخێکی نوێی رێکخستنی یاسایی دەستپێدەکەن.
د. شکار لەبارەی بازاڕی زیوەوە دەڵێ: "پێشتر %60ی خواستی سەر زیو بۆ بواری پیشەسازی بوو، بەڵام ئێستا وەبەرهێنەرانی تاکەکەسی و سندووقەکانی وەبەرهێنان هاتوونەتە نێو بازاڕەکە، ئەمەش وایکردووە خواست لەسەر زیوی فیزیکی بە شێوەیەکی بەرچاو زیاد بکات."
سەبارەت بە جیاوازیی نرخ لە هەرێمی کوردستان، د. شکار دەڵێت: "جیاوازییەکی زۆر هەیە لەنێوان نرخی زیو لە بۆرسە جیهانییەکان و بازاڕی فیزیکی لە کوردستان و جیهان. بۆ نموونە، کاتێک لە بۆرسەدا نرخەکە 3500 دۆلار بوو بۆ کیلۆیەک، لە بازاڕی فیزیکیی کوردستان گەیشتە سەروو 5000 دۆلار. ئەمەش بەهۆی کەمیی زیوی فیزیکی و زۆریی خواستەوەیە."
ئەو راوێژکارە داراییە دەڵێ، نرخی راستەقینەی زیو لەنێوان 60 بۆ 65 دۆلارە نەک ئەو نرخەی ئێستا؛ دەشڵێت، ئێستا زیاتر خواستی وەبەرهێنان لەسەر زیو هەیە لەسەر ئاستی تاکەکەس، ئەگەر ئەو خواستە کەمبێتەوە، ئەگەری دابەزینی زیاتری نرخەکەی هەیە، بەڵام ئەگەر ئەو خواستەی لەسەریەتی لە کەرتی پیشەسازی بێت و زیادبێت، ئەوە دەتوانێت بەئاسانی بگاتەوە 100 دۆلار بۆ هەر ئۆنسەیەک.
د. شکار پێیوایە، ئێستا نرخی زێڕ گونجاوە بۆ کڕین، بەڵام ئەوانەی پارەی زۆریان هەیە، باشترە لە چەند نرخێکدا و بە چەند جارێک بیکڕن، چونکە زێڕ هەمیشە وەک وەبەرهێنانێکی سەلامەت دەمێنێتەوە.
پێش زیاتر لە هەفتەیەک، دۆناڵد ترەمپ، سەرۆکی ئەمریکا کێڤن وارشی بۆ سەرۆکی داهاتووی بانکی ناوەندیی وڵاتەکەی بەربژێرکرد.
وارش بە کەسێکی تووند لە سیاسەتی نەختینەیی ناسراوە و بازرگان و وەبەرهێنەران ترسی ئەوەیان هەیە لە کەمکردنەوەی رێژەی سوود بەخێرایی هەنگاونەنێت، ئەمە هۆکارێکی سەرەکیی دابەزینی ئەمدواییەی نرخی زێڕ و زیو بوو.
ئەمە پێچەوانەی خواستی ترەمپە کە بەردەوام داوای کەمکردنەوەی رێژەی سوود دەکات.
د. شکار هەڵەبجەیی بەدووری دەزانێت رێککەوتنی نهێنی لەنێوان ترەمپ و وارش هەبێت و سیاسەتی سەرۆکی ئەمریکا جێبەجێ بکرێ و دەڵێ، ئەگەر بانکی ناوەندیی ئەمریکا بکەوێتە ژێر کاریگەریی راستەوخۆی سیاسەت، متمانەی خۆی لەدەست دەدات، بەڵام کەسایەتییەکی وەک کیڤن وارش قورسایی خۆی هەیە و بازاڕ متمانەی پێیەتی.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ