رووداو - هەولێر
کێڵگە پەلەوەرییەکانی هەرێمی کوردستان بە رەچاوەکردنی رێنماییە تەندروستییەکان دەتوانن مریشک رەوانەی بازاڕەکانی باشوور و ناوەڕاستی عێراق بکەن.
وەزارەتی كشتوكاڵ و سەرچاوەكانی ئاوی حکومەتی هەرێمی کوردستان رایگەیاند، "لەچوارچێوەی بەدواداچوونی بەردەوام بۆ ئەو كێشە و گرفتانەی رووبەڕووی پرۆژە كشتوكاڵییەكانمان دەبنەوە، بەتایبەت خاوەن كێڵگە پەلەوەرییەكان، بڕیاردرا بەرەچاوكردنی رێكارەكانی خۆپارێزی و تەندروستی رێگە بكرێتەوە بۆ ناردنی مریشك بۆ ناوەڕاست و خوارووی عێراق، دوای ئەوەی لەپێداویستی بازاڕی ناوخۆییمان زیاد دەبێت".
وەزارەتی کشتوکاڵ و سەرچاوەکانی ئاو ئاماژەی بەوەکردووە، ئەو هەنگاوە بۆ ساخكردنەوەی بەرهەمی خاوەن كێڵگەكان و پاڵپشتیكردنیانە، وەك بنەمایەكی گرنگی كەرتی كشتوكاڵ لە هەرێمی كوردستاندا.
وەزارەتی کشتوکاڵ و سەرچاوەکانی ئاو باسی لەوە کردووە، ژووری ئۆپەراسیۆنی پارێزگاكان كارئاسانی دەكەن بۆ خاوەن پرۆژەكان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ