رووداو دیجیتاڵ
نرخی زێڕ رۆژی هەینی بەرزبووەوە، بەڵام لەسەر ئاستی هەفتانەدا یەکەم دابەزینی تۆمارکرد لە ماوەی پێنج هەفتەی رابردوودا. ئەمەش بەهۆی بەردەوامی نیگەرانییەکان لە هەڵاوسان و نادیاری دۆخی جەنگی نێوان ئەمریکا و ئێران کە بازاڕەکانی گواستووەتەوە بۆ دۆخی ئامادەیی.
رۆژی هەینی نرخی زێڕ بە رێژەی 0.7% بەرزبووەوە و گەیشتە 4707 دۆلار بۆ هەر ئۆنسەیەک. لە سەرەتای مامەڵەکاندا نرخی زێڕ زیاتر لە 1% بەرزبووەوە، بەڵام لەم هەفتەیەدا زیاتر لە 2% لە بەهای خۆی لەدەستداوە. نرخی زێڕ لە گرێبەستەکانی داهاتوودا بۆ رادەستکردنی لە مانگی حوزەیران بە رێژەی 0.4% بەرزبووەوە بۆ 4,741 دۆلار.
نرخی زێڕ لە مانگی ئاداردا بە شێوەیەکی بەرچاو دابەزی، لەبەر ئەوەی جەنگی نێوان ئەمریکا و ئێران بووە هۆی بەهێزبوونی دۆلار و دروستبوونی ترس لە بەرزبوونەوەی هەڵاوسان، ئەمەش کاریگەری نەرێنی لەسەر خواست بۆ زێڕ دروست کرد.
تەنگەی هورمز هێشتا داخراوە هەرچەندە هێرشە سەربازییەکانی لایەنە پەیوەندیدارەکان کەمی کردووە. ئەمەش وایکردووە وەبەرهێنەران خۆیان بۆشاییەکان پڕ بکەنەوە یان کاردانەوەیان هەبێت بۆ لێدوانەکانی دۆناڵد تڕەمپ، سەرۆکی ئەمریکا، کە هەندێک جار هیوای رێککەوتن بۆ کۆتاییهێنان بە جەنگ دەخوڵقێنێت و هەندێک جاریش هەڕەشەی دەستپێکردنەوەی هێرشەکان دەکات.
سەرچاوە حکومییەکانی پاکستان رایانگەیاندووە، عەباس عێراقچی، وەزیری دەرەوەی ئێران، رۆژی هەینی دەگاتە ئیسلام ئابادی پایتەختی پاکستان بۆ تاوتوێکردنی پێشنیارەکان بۆ دەستپێکردنەوەی گفتوگۆکانی ئاشتی لەگەڵ ئەمریکا. لە لایەکی ترەوە، ئیسرائیل و لوبنان ئاگربەستەکەیان بۆ 3 هەفتە درێژکردەوە.
دانیال پاڤیلۆنیس، ستراتیژیستی باڵای بازاڕ لە (RJO Futures) لەو بارەیەوە: "بەهۆی هەموو ئەو ناڕوونییانەی هەیە، بازاڕی زێڕ بە تەواوی لەژێر کاریگەری سەردێری هەواڵەکانە. هەواڵەکانیش ئێستادا وەک ئەوە دەردەکەون کە ئێران و ئەمریکا مەیلیان بەرەو جۆرە رێککەوتنێکی ئاشتی بڕۆن، بازاڕ ئێستادا وەک بارودۆخێکی ئەرێنی سەیری دۆخەکە دەکات. نرخەکانی وزەش کەمێک دابەزیون."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ