رووداو دیجیتاڵ وەزارەتی کارەبای عێراق رایدەگەیێنێت، بەهۆی ئەو دۆخە ئەمنییەی لە ناوچەکەدا دروست بووە، پێدانی گاز لە کێڵگەی دانە گاز لە هەرێمی کوردستان راگیراوە و هۆشداریش دەدات کە ئەگەر راگیرانەکە بەردەوام بێت، نزیکەی 1400 مێگاوات کارەبا لە تۆڕی نیشتمانی کەم دەکات. ئەحمەد تورکی جەیاد، گوتەبێژی وەزارەتی کارەبای عێراق، رۆژی پێنجشەممە، 16ـی تەممووزی 2026، لە راگەیێندراوێکدا بڵاویکردەوە: "ئاگادارکراوینەتەوە کە بەهۆی ئەو دۆخە ئەمنییەی ناوچەکەی گرتووەتەوە، پێدانی گاز لە کێڵگەی دانە گاز لە هەرێمی کوردستان راگیراوە." لەبارەی هەنگاوەکانیان بۆ رووبەڕووبوونەوەی ئەو کێشەیە، وەزارەتی کارەبای عێراق ئاماژەی بەوە کردووە، دەستیان بە گرتنەبەری سەرجەم رێکارە تەکنیکییەکان کردووە و پلانی فریاگوزارییان بۆ بەڕێوەبردنی سیستمی کارەبا داناوە؛ ئەوەش لە رێگەی دابەشکردنەوەی بارگرانی و بەگەڕخستنی سەرجەم یەکەکانی بەرهەمهێنانی بەردەست، بە ئامانجی کەمکردنەوەی کاریگەرییەکانی ئەو کورتهێنانە و پاراستنی سەقامگیریی سیستمی کارەبای نیشتمانی. وەزارەتی کارەبای عێراق دەڵێت، لەگەڵ لایەنە پەیوەندیدارەکان لە هاوئاهەنگیدایە بۆ چاودێریکردنی پێشهاتەکان، بۆ ئەوەی گەرەنتی بکرێت یەکەکانی بەرهەمهێنان بە توانای ئاسایی خۆیان دەست بەکاربکەنەوە. وەزارەتی کارەبای عێراق هاوکات داوا لە هاووڵاتییان دەکات لەم ماوەیەدا هاوکار بن و کارەبا بەفیڕۆ نەدەن، جەختیش دەکاتەوە کە لە رێگەی سەکۆ فەرمییەکانییەوە رای گشتی لە هەر پێشهاتێکی نوێ ئاگادار دەکاتەوە.
