رووداو دیجیتاڵ
هاوپەیمانیی چوارچێوەی هاوئاهەنگی کۆبوونەوەی هەفتانەی خۆی ئەنجامدا و تێیدا سەرۆکوەزیران باسی لە جێبەجێکردنی پڕۆژەکان کرد؛ هاوپەیمانێتییەکە جەختی لە بنەما جێگیرەکانی عێراق کردەوە، بەوەی دوور بێت لە دەرهاویشتەکانی ململانێی هەرێمی و نێودەوڵەتی.
کۆبوونەوەی هاوپەیمانیی چوارچێوەی هاوئاهەنگی شەوی دووشەممە، 12ی تشرینی یەکەم لە نووسینگەی عەممار حەکیم، سەرۆکی رەوتی حیکمە لە بەغدا ئەنجامدرا و عەلی فالح زەیدی، سەرۆکوەزیران ئامادەی بوو.
بەگوێرەی راگەیێندراوێکی هاوپەیمانێتییەکە، گوێبیستی روونکردنەوەی سەرۆکوەزیران بوون لەبارەی ئەو پێشکەوتنانەی لە بواری جێبەجێکردنی پڕۆژەکاندا بەدیهاتوون، بەتایبەت دەستپێشخەریی پڕۆژەی نیشتەجێبوونی "دەستپێشخەریی نیشتمان".
هاوپەیمانیی چوارچێوەی هاوئاهەنگی ستایشی ئامادەیی هێزە چەکدارەکانی کردووە، لە راوەدوونانی پاشماوەکانی تیرۆر و قایمکردنی سنوور و پاراستنی ئاسایش و سەقامگیری، هەروەها پشتیوانییان بۆ هەموو ئەو رێوشوێنانە دەربڕیوە، کە سەروەریی وڵات و پارێزراویی خاکەکەی گەرەنتی دەکەن.
لەبارەی دۆخی دەرەوە، بەشدارانی کۆبوونەوەی هاوپەیمانیی چوارچێوەی هاوئاهەنگی باسیان لە گرژییەکان و پێشهاتەکانی ئێستای ناوچەکە کردووە، جەختیان لە بنەما جێگیرەکانی عێراق کردووەتەوە لە پاڵپشتیکردنی هێورکردنەوە و چارەسەری قەیرانەکان لە رێگەی دیالۆگی دیپلۆماسی، پاراستنی بەرژەوەندییە نیشتمانییە باڵاکان و دوورخستنەوەی عێراق لە دەرهاویشتەکانی ململانێی هەرێمی و نێودەوڵەتی.
