رووداو دیجیتاڵ
گوتەبێژی دەستەی سەرۆکایەتیی پەرلەمانی ئێران دەڵێت، دانیشتنی داخراوی پەرلەمان بە بەشداریی وەزیری دەرەوە و سوپاسالاری ئێران دەستی پێکردووە.
میدیای فەرمیی ئێران لە زاری عەباس گودەرزی، گوتەبێژی دەستەی سەرۆکایەتیی پەرلەمانی ئێران بڵاویکردەوە، دانیشتنی ئەمڕۆی پەرلەمانی ئێران بە مەبەستی تاوتوێکردنی پرسە گرنگە ناوچەیی و نێودەوڵەتییەکان داخراوە.
عەباس گودەرزی گوتی، دانیشتنەکە بە بەشداریی عەباس عێراقچی، وەزیری دەرەوە و عەبدولڕەحیم موسەوی، سوپاسالاری ئەو وڵاتە بەڕێوەدەچێ.
رۆژی یەکشەممە، 8ـی شوباتی 2026، عەلی رەزا سەلیمی، ئەندامی دەستەی سەرۆکایەتیی پەرلەمانی ئێران رایگەیاند: "سبەی پەرلەمان لەسەر دوایین دۆخی دانوستانەکانی ئێران و ئەمریکا دانیشتنێکی داخراو بەڕێوە دەبات."
دانوستاندنەکەی مەسقەت لە کاتێکدا کرا ئەمریکا کەشتیی فڕۆکەهەڵگری هێناوەتە ناوچەکە و دۆناڵد ترەمپ، سەرۆکی وڵاتەکە هەڕەشە لە بەرپرسانی تاران دەکات ئەگەر نەگەنە رێککەوتن، ''شتی خراپ'' روودەدات.
لە بەرامبەردا وەزیری دەرەوەی ئێران دەڵێ: ''بە هێزی سەربازیی ئەوان لە ناوچەکە، ناترسێین. ئێمە لەگەڵ دیپلۆماسین، بەڵام شارەزای جەنگیشین.''
پار پێنج گەڕی دانوستاندن لەنێوان ئێران و ئەمریکا بەڕێوەچوون، بەڵام دۆخەکە ئاڵۆزتر بوو کاتێک لە مانگی حوزەیرانی 2025 جەنگێکی 12 رۆژە لەنێوان ئیسرائیل و ئێران روویدا و لە رۆژانی کۆتاییشدا ئەمریکا سێ بنکەی ئەتۆمیی ئێرانی بۆردوومان کرد.