رووداو دیجیتاڵ
بەرزترین فەرماندەی سەربازیی هاوپەیمانیی باکووری ئەتڵەسی (ناتۆ)، سبەی دووشەممە، هۆشدارییەک ئاراستەی رووسیا دەکات، ئەمەش لە کاتێکدایە کە ترسی وڵاتانی ئەورووپا لە هەڕەشەکانی رووسیا رووی لە زیادبوونە.
بەرپرسانی ناتۆ دەڵێن، جەنەراڵی ئەمریکی، ئەلێکسۆس گرینکێڤیچ، فەرماندەی باڵای هێزەکانی ناتۆ لە ئەورووپا، لە کۆنفرانسێکی ئەمنیدا لە شاری وارشۆی پایتەختی پۆڵەندا، "تیۆریی سەرکەوتن"ی خۆی دەخاتەڕوو بۆ رووبەڕووبوونەوەی هەر هێرشێکی رووسیا.
ئامانج لەم هەنگاوە ئەوەیە کە ناتۆ پەیامێکی روون و تووند بداتە مۆسکۆ تاوەکو ئەو هێرشە "تێکەڵاوانە" رابگرێت کە دژی ئەو وڵاتانە دەیانکات کە پشتگیری لە ئۆکراینا دەکەن. بۆ نموونە، لەم مانگانەی دواییدا رووداوی مەترسیدار روویانداوە، وەک دۆزینەوەی درۆنێکی پڕ لە تەقەمەنی لە فڕۆکەخانەیەکی ئەڵمانیا.
کۆلۆنێل مارتن ئۆدۆنێڵ، گوتەبێژی جەنەراڵە ئەمریکییەکە گوتی: "بیرۆکەکەی فەرماندەی باڵا زۆر سادەیە: پاراستنی باڵادەستیی ناتۆ بەپێی پلانەکانی بەرگری و پێشگرتن." گوتیشی: "بە لەبەرچاوگرتنی ئاڵۆزیی دۆخی ئەمنیی جیهان، دەبێت هەر ئێستا زەمینەسازی بکەین بۆ رێگریکردن لە هەر دەستدرێژییەک و ئەگەر پێویستیشی کرد و هێرشمان کرایەسەر، ئەوا بیبەینەوە."
بۆچی ئەمە گرنگە؟
ناتۆ کە دوای جەنگی دووەمی جیهانی بۆ رووبەڕووبوونەوەی یەکێتیی سۆڤیەت دروستبوو، بە درێژایی مێژوو هەمیشە پلانە سەربازییەکانی بە نهێنی هێشتووەتەوە. هەرچەندە چاوەڕوان ناکرێت فەرماندەکەی ناتۆ نهێنییە سەربازییەکان ئاشکرا بکات، بەڵام ئەم قسانە زیاتر بۆ ترساندنی مۆسکۆ و دڵنیاکردنەوەی ئەو وڵاتانەی ناتۆیە کە دەکەونە سەر سنووری رووسیا (باڵی رۆژهەڵات).
بەرپرسانی رۆژئاوا دەڵێن، لەبەر ئەوەی رووسیا لە ئۆکراینادا تووشی گرفت بووە، لە بەرامبەردا هێرشە شاراوەکانی خۆی لە دژی ئەورووپا بوێرتر کردووە کە رەنگە ببێتە هۆی زیانی گیانیی زۆر. کێشەی ناتۆ ئەوەیە کە نازانێت چۆن مامەڵە لەگەڵ ئەم رووداوانەدا بکات کە دەکەونە ناوچەی نێوان "ئاشتی و جەنگەوە."
کاردانەوە و گۆڕانکارییەکان
مارک رووتە، سکرتێری گشتیی ناتۆ داوای لە وڵاتانی ئەندام کردووە هێمن بن و بەردەوام بن لە یارمەتیدانی ئۆکراینا و دەڵێت: "نابێت بەرامبەر رووسیا ساویلکە بین... بەڵام ئەوانیش باش دەزانن کە ئێمە بەهێزترین."
ئەم جووڵانەی رووسیا لە کاتێکدایە کە وڵاتانی ئەورووپا خۆیان ئامادە دەکەن بۆ ئەگەری کەمبوونەوەی ژمارەی سەربازانی ئەمریکا لە کیشوەرەکەیان؛ چونکە وەزارەتی بەرگریی ئەمریکا (پێنتاگۆن) سەرقاڵی پێداچوونەوەیە بە بڵاوەپێکردنی هێزەکانیدا لە ئەورووپا و چاوەڕوان دەکرێت لە کۆتایی ئەمساڵدا بڕیاری نوێ لەو بارەیەوە رابگەیێنێت.
