رووداو دیجیتاڵ
سەرۆک مەسعود بارزانی بە بۆنەی 51ـەمین ساڵیادی دامەزراندنی یەكێتیی زانایانی ئایینی ئیسلامیی كوردستان رایدەگەیێنێت، دامەزراندنی یەکێتییەکە "لەسەر دەستی بارزانیی نەمر هەنگاوێكی گرنگ بوو بە ئاراستەی بەهێزتركردنی رۆڵی مامۆستایان و گەورەپیاوانی ئایینی بۆ پتەوكردنی بنەماكانی دینداری و خواناسی و بڵاوكردنەوەی فەرهەنگی پێكەوەژیان و مرۆڤدۆستی."
سەرۆک بارزانی پیرۆزبایی لە مامۆستایان، گەورە زانایانی ئایینی ئیسلامیی كوردستان، سەرۆك و ئەندامانی مەكتەبی تەنفیزی و ئەنجوومەنی ناوەندی یەكێتیی زانایانی ئایینی ئیسلامیی كوردستان دەکات.
سەرۆک بارزانی راشیگەیاندووە، مامۆستایان و زانایانی ئایینی ئیسلامیی كوردستان لە قۆناخی خەبات و شۆڕشدا رۆڵی بەرچاویان هەبووە لە بەرزكردنەوەی هۆشیاریی نەتەوەیی خەڵك و ناساندنی مافەكان و رەتكردنەوەی زوڵم و بندەستی.
لەبارەی رۆڵ و کاریگەریی یەکێتیی زانایان، مامۆستایان و پیاوانی ئایینی، سەرۆک بارزانی دەڵێت، رۆڵیان "زۆر بەرز دەنرخێنم كە لەو كاتەی تیرۆر هەڕەشەیەكی گەورەیە لە ئاستی ناوچەیی و جیهانیدا بە حیكمەت و شارەزاییان لە بنەما پیرۆزەكانی ئایینی هۆكارێكی بەهێزبوونە بۆ ئەوەی هزری تووندڕەویی و تیرۆر نەتوانێت لەنێو گەلەكەمان شوێن و پێگە بكاتەوە."
بەبۆنەی ئەو یادەوە، سەرۆک بارزانی دەڵێت، "هیوای سەركەوتن بۆ یەكێتیی زانایانی ئایینی ئیسلامی دەخوازم و سوپاسی ماندووبوون و ئەركە پیرۆزەكەیان دەكەم."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ