دروستبوونی قەرەباڵخی بەهۆی داخستنی رێگەی کۆیە - هەولێرەوە. وێنە: رووداو
رووداو دیجیتاڵ
قایمقامی قەزای کۆیە رایگەیاند، بەهۆی وەرگەڕانی تانکەرێکی غازی شلەوە لە نزیک بازگەی تۆپزاوا لەسەر رێگەی هەولێر - کۆیە ماوەی زیاتر لە دوو کاژێر رێگەکەیان داخست، دواتر رێگەکەیان کردەوە.
رۆژی دووشەممە 21-11-2022، رووداوێکی هاتووچۆ لە نێوان تانکەرێکی غازی شل و ماتۆڕسکیلێک روویدا، بەهۆیەوە ماتۆڕسوارەکە گیانی لەدەستدا و تانکەرەکەش وەرگەڕا.
تاريق حەیدەری، قایمقامی قەزای کۆیە بە رووداوی گوت: "رووداوەکە کاژێر 6:20 خولەک لە نزیک بازگەی تۆپزاوا لەسەر رێگەی کۆیە - هەولێر روویدا، بەهۆیەوە تانکەرەکە وەرگەڕا و بەهۆی کونبوونیی تانکییەکەیەوە غازێکی زۆر رۆیشت، بۆ پاراستنی گیانی رێبواران زیاتر لە دوو کاژێر رێگەکەمان داخست، دوای ئەوەی کۆمپانیا هات و تانکەرەکەیان برد رێگەکەمان کردەوە."
بەهۆی وەرگەڕانی تانکەرێکی گواستنەوەی غاز، رێگەی کۆیە - هەولێر داخراوە. ئەم ڤیدیۆیە بازگەی کۆیەیە pic.twitter.com/wgO6oK4tw3
— Rudaw (@Rudawkurdish) November 21, 2022
سەبارەت بە ناسنامەی قوربانییەکەش، تاريق حەیدەری گوتی: "ئەو کوڕەی گیانی لەدەستدا دانیشتووی کۆیەیە و ناوی حەسەن عەبدولباقی شێخەروانییە کە شۆفێری ماتۆڕسکیلەکە بووە."
رێگەی هەولێر - کۆیە یەکێکە لە رێگە سەرەکییەکانی بەستنەوەی پارێزگای هەولێر بە سلێمانییەوە. رێگەکە یەک سایدە و تاوەکو ئێستا چەندین رووداوی سەختی هاتووچۆ لەسەر رێگەکە روویانداوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ