رووداو دیجیتاڵ
لە بارەی کۆبوونەوەی رۆژی دووشەممەی لەگەڵ نێچیرڤان بارزانی، سەرۆکی هەرێمی کوردستان؛ تۆم باراک، باڵیۆزی ئەمریکا لە تورکیا و نێردەی تایبەتی وڵاتەکەی بۆ کاروباری سووریا، لە پۆستێکی تۆڕی کۆمەڵایەتی ئێکس نووسیویەتی: "گفتوگۆیەکی تێروتەسەلی پڕ لە راوێژ و گۆڕینەوەی بیروڕاو و ئەزموونمان هەبوو."
باراک رۆژی 23ـی شوباتی 2026، لە هەولێر زنجیرەیەک کۆبوونەوەی ئاستبەرزی لەگەل سەرکردەکانی هەرێمی کوردستان کرد، ئەمەش لەکاتێکدایە گفتوگۆکان لەبارەی پەیوەندییە دووقۆڵییەکان، پرۆسەی سیاسیی عێراق و سەقامگیریی ناوچەکە لە دوای گۆڕانکارییەکانی ئەم دواییەی سووریا بەردەوامن.
سەردانەکەی باراک بۆ هەولێر بەشێک بوو لە گەشتێکی فراوانتری کە پێشتر لە بەغدا لەگەڵ محەممەد شیاع سوودانی، سەرۆکوەزیران و فوئاد حوسێن، وەزیری دەرەوەی عێراق کۆبووەوە، تێیدا چەندین پرسی وەکو هاوئاهەنگییەکانی بەرەنگاربوونەوەی تیرۆر، هاوبەشیی ئابووری، پێشهاتەکانی سووریا و گواستنەوەی دەستگیرکراوانی داعش تاوتوێ کران.
سەرەتا باراک لە پیرمام لەگەڵ سەرۆک بارزانی کۆبووەوە. لە گفتوگۆکەدا تیشک خرایە سەر رۆڵی لەمێژینەی سەرۆک بارزانی لە هێورکردنەوەی دۆخی ناوچەکە. باراک ستایشی "دانایی و رێنوێنییەکانی" سەرۆک بارزانی کرد کە بەنرخن بۆ چارەسەرکردنی ئاڵنگارییەکانی عێراق، لەنێویاندا رێگریکردن لە تەشەنەسەندنی ململانێکان لە سووریاوە.
سەرۆک بارزانی جەختی لەوە کردووەتەوە کە چوارچێوەی هاوئاهەنگیی شیعەکان دەسەڵاتی دیاریکردنی بەربژێری سەرۆکوەزیرانی داهاتووی عێراقی هەیە، هاوکات پێداگریی لەسەر پێویستیی پابەندبوونی هەر بەربژێرێک کردووە بە بنەماکانی دەستوور، هاوبەشی، هاوسەنگی، سازان و بەرژەوەندییە نیشتمانییەکانی عێراق.
دواتر لە هەمان رۆژدا، باراک لەگەڵ نێچیرڤان بارزانی کۆبووەوە، کە جۆشوا هاریس، بەرپرسی کاروباری باڵیۆزخانەی ئەمریکا لە بەغدا یاوەری بوو. بەگوێرەی راگەیێندراوی سەرۆکایەتیی هەرێمی کوردستان و پۆستێکی باراک لە تۆڕی کۆمەڵایەتیی ئێکس، گفتوگۆکان ئەم تەوەرانەیان لەخۆگرتبوو:
• بەهێزکردنی پەیوەندییەکانی نێوان ئەمریکا و عێراق، لەنێویاندا لەگەڵ هەرێمی کوردستان.
• پرۆسەی سیاسیی نێوخۆی عێراق و دواکەوتنی پێکهێنانی حکومەت.
• پێشهاتەکانی ئەم دواییەی سووریا، کە لە کانوونی دووەمی 2026 بە نێوەندگیریی ئەمریکا ئاگربەست و رێککەوتنەکانی قۆناخی راگوزەری سیاسیی پەیوەست بە کورد بەرەوپێشچوون.
بە گوێرەی راگەیێندراوێکی سەرۆکایەتیی هەرێمی کوردستان، سەرۆکی هەرێمی کوردستان دووپاتیکردەوە کە هەرێمی کوردستان پابەندە بەوەی وەک کۆڵەکەی ئاشتی و سەقامگیری بمێنێتەوە و جەختی لەوە کردەوە کە گفتوگۆ تاکە رێگەی بنەڕەتییە بۆ چارەسەرکردنی ناکۆکییەکان و پاراستنی ئارامیی ناوچەکە. باراک کۆبوونەوەکەی بە "گفتوگۆیەکی تێروتەسەلی پڕ لە ئامۆژگاری و گۆڕینەوەی بیروڕا و ئەزموون" وەسف کرد.
هەروەها باراک وێنەکانی کۆبوونەوەکانیشی بڵاوکردەوە، کە تێیدا کۆبوونەوەی فەرمیی دووقۆڵی و بەکۆمەڵ دەردەکەون و ئاڵاکانی ئەمریکا، عێراق و کوردستان بە روونی پیشان دراون.
سەردانەکەی هەولێر هاوکاتە لەگەڵ چەقبەستنی هەوڵەکانی عێراق بۆ پێکهێنانی حکومەتێکی نوێ دوای هەڵبژاردنەکانی 11ی تشرینی دووەمی 2025، لەکاتێکدا ئەمریکا نیگەرانە لە بەربژێرکردنەوەی نووری مالیکی، سەرۆکوەزیرانی پێشووتر بۆ پۆستی سەرۆکوەزیران.
![نێچیرڤان بارزانی، سەرۆکی هەرێمی کوردستان [لای راست] و تۆم باراک نوێنەری دۆناڵد ترەمپ بۆ کاروباری سووریا.](https://www.rudaw.net/s3/rudaw.net/ContentFiles/936415Image1.jpg?mode=crop&quality=70&rand=1&scale=both&w=362&h=226&version=8517202 "نێچیرڤان بارزانی، سەرۆکی هەرێمی کوردستان [لای راست] و تۆم باراک نوێنەری دۆناڵد ترەمپ بۆ کاروباری سووریا.")
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ