پاکستان پێشنیازێکی 15 خاڵیی ئەمریکای گەیاندە ئێران

 

بەگوێرەی ئەو بەرپرسانەی ئاگاداری وردەکارییەکانن، عاسم مونیر، سوپاسالاری پاکستان، رۆڵی نێوەندگیری سەرەکی دەگێڕێ و سوود لە پەیوەندییە بەهێزەکانی لەگەڵ سوپای پاسداران و بەرپرسانی دیکەی ئێران وەردەگرێ بۆ نزیککردنەوەی هەردوو لایەنی جەنگ.

 

بە گوێرەی میدیای ئەمریکا، عاسم مونیر پەیوەندی بە محەممەد باقر قالیباف، سەرۆکی پەرلەمانی ئێران کردووە، بەمەبەستی پێشنیازکردنی میوانداریکردنی دانوستاندنی راستەوخۆ لەلایەن پاکستانەوە. 

 

ئەم هەوڵە پشتیوانیی ئاشکرای شەهباز شەریف، سەرۆکوەزیرانی پاکستانی بەدەستهێناوە کە لە تۆڕە کۆمەڵایەتییەکان رایگەیاند، وڵاتەکەی "بە تەواوی پاڵپشتیی هەوڵە بەردەوامەکان دەکات بۆ گرتنەبەری رێگەی دیالۆگ بەمەبەستی کۆتاییهێنان" بە جەنگەکە. 

 

لە کاتێکدا ئیدارەی دۆناڵد ترەمپ هەوڵەکانی بۆ دۆزینەوەی دەرچەیەکی دیپلۆماسی چڕکردووەتەوە، جەخت لەوە دەکاتەوە کە ئۆپەراسیۆنە سەربازییەکەی بەردەوام دەبێت. کارۆلاین لێڤیت، گوتەبێژی کۆشکی سپی پشتڕاستی کردەوە کە تاوتوێی بژاردە دیپلۆماسییەکان دەکرێ، بەڵام رایگەیاند کە ئۆپەراسیۆنە سەربازییەکان بەردەوام دەبن. لێڤیت گوتی: "لە کاتێکدا سەرۆک ترەمپ و تیمە دانوستاندنکارەکەی لەم دەرفەتە نوێیەی دیپلۆماسی ورد دەبنەوە، ئۆپەراسیۆنی توڕەیی داستانئاسا بەبێ وەستان بەردەوامە بۆ بەدیهێنانی ئامانجە سەربازییەکانی کە لەلایەن فەرماندەی گشتیی هێزە چەکدارەکان و پێنتاگۆنەوە دیاری کراون."

 

بەگوێرەی ئەو بەرپرسانەی کە وردەکارییەکانیان داوەتە میدیای ئەمریکا، پێشنیازەکە داوا لە ئێران دەکات تواناکانی پەرەپێدانی چەکی ئەتۆمی هەڵبوەشێنێتەوە، هەموو چالاکییەکی پیتاندنی یۆرانیۆم رابگرێ و یۆرانیۆمی پیتێندراوی ئێستای رادەستی ئاژانسی نێودەوڵەتیی وزەی ئەتۆم بکات، هەروەها داوای کۆتاییهێنان بە پشتیوانییەکانی ئێران بۆ گرووپە هاوپەیمانەکانی لە ناوچەکەدا دەکات و سنوور بۆ بەرنامە مووشەکییەکەی دادەنێت. لە بەرامبەردا، پلانەکە هەڵگرتنی سزا نێودەوڵەتییەکان و پێشکێشکردنی هاوکاریی ئەمریکای بۆ بەرنامەیەکی ئەتۆمیی مەدەنی لەخۆدەگرێت.

 

لەگەڵ ئەوەشدا، رێگەی دانوستاندنەکان رووبەڕووی ئاستەنگ دەبێتەوە. هێشتا روون نییە ئایا ئیسرائیل پشتیوانی لەم پێشنیازە دەکات یان نا. هەروەها تاوەکو ئێستا پێکهاتەیەکی دەسەڵاتی روون بۆ بڕیاردان لەسەر پرسەکانی شەڕ و ئاشتی دەرنەکەوتووە. ئەم دۆخە نائارامە نێوخۆییە، لەگەڵ مەترسیی ئەنجامدانی هێرشی زیاتر وایکردووە کۆمەڵگەی نێودەوڵەتی دڵنیا نەبێت لەوەی کە ئایا هەوڵە دیپلۆماسییەکانی ئەمریکا لە تاران گوێگری دەبێت یان نا.

 

 

1. دەبێ ئێران تواناکانی ئێستای ئەتۆمی هەڵبوەشێنێتەوە.

 

2. دەبێ ئێران بەڵێن بدات هەرگیز هەوڵی بەدەستهێنانی چەکی ئەتۆمی نەدات.

 

3. نابێ هیچ پیتاندنی یۆرانیۆم لە خاکی ئێران هەبێت.

 

4. دەبێ ئێران کۆگای یۆرانیۆمی پیتێندراوی رادەستی ئاژانسی نێودەوڵەتیی وزەی ئەتۆم بکات.

 

5. دەبێ دامەزراوە ئەتۆمییەکانی نەتەنز و ئەسفەهان و وێستگەی پیتاندنی سووتەمەنیی فۆردۆ هەڵبوەشێندرێنەوە.

 

6. دەبێ رێگەی تەواو بە ئاژانسی نێودەوڵەتیی وزەی ئەتۆم بدرێ بگاتە دامەزراوە ئەتۆمییەکانی ئێران.

 

7. ئێران دەبێ واز لە گرووپە نزیکەکانی لە ناوچەکە بهێنێت.

 

8. ئێران دەبێ پارەدارکردن، ئاراستەکردن و پڕچەککردنی گرووپە نزیکەکانی رابگرێ.

 

9. دەبێ تەنگەی هورمز بە کراوەیی بمێنێتەوە.

 

10. دەبێ بەرنامەی مووشەکیی ئێران لە رووی مەودا و ژمارەوە سنووردار بکرێت

 

11. ئێران دەبێ بەکارهێنانی مووشەک تەنیا بۆ بەرگری لە خۆی سنووردار بکات.

 

12. کۆتاییهێنان بەو سزایانەی لەلایەن کۆمەڵگەی نێودەوڵەتییەوە سەپێندراون.

 

13. یارمەتیی ئەمریکا بۆ پێشخستنی بەرنامەی ئەتۆمیی مەدەنی.

 

14. لابردنی میکانیزمی سناپباک کە رێگە بە سەپاندنەوەی ئۆتۆماتیکیی سزاکان دەدات ئەگەر ئێران پابەند نەبێت.