ئالوودەبووەکان لە کامپەکەدا
رووداو دیجیتاڵ
بەشێک لە بەکارهێنەرانی تۆڕەکۆمەڵایەتییەکان لە ئێران، دیمەنی کامپێکی وازپێهێنان لە ماددەی هۆشبەر بڵاوبووەتەوە کە کاردانەوەی زۆری لێکەوتەوە و بووەهۆی داخستنی کامپەکە لەلایەن حکومەتەوە.
لە کامپی "قەڵات" لە شاری شیراز کە ناوەندێکە بۆ وازپێهێنان لە ماددەی هۆشبەر، تووندوتیژی لەگەڵ ئالوودەبووان دەکرێت و تێیدا بە لێدان و ئەشکەنجەدان، خستنەنێو سەهۆڵاوی ئالودەبووان و جنێو و سووکایەتی پێیان، هەوڵی وازپێهێنان لە ماددەی هۆشبەر دەدرێت.
لەو ڤیدیۆیەی لە سۆشیاڵمیدیادا بڵاوبووەتەوە دەردەکەوێت، ئالوودەبووان بە جلوبەرگەوە دەخرێنە نێو سەهۆڵاوەوە و دوایی بە داردەست و قەمچی لێیان دەدرێت و ئەشكەنجە دەدرێن.
ئەو دیمەنانەش کاردانەوەیەکی زۆری لێکەوتەوە، بەڕێوەبەرایەتیی رێکخراوی خۆشبژێویی شاری شیراز، دوای بینینی ڤیدیۆکە بڕیاری داخستنی ناوەندەکەی داوە و "فەرمانبەرانی ناوەندەکەی بە تاوانی تووندوتیژی لەگەڵ نەخۆشدا دایە دادگە، تاوەکو دادگایی بکرێن".
هەروەها ئالوودەبووانی ئەشکەنجەدراویشی گواستەوە بۆ نەخۆشخانەکانی شاری شیراز تاوەکو لەژێر چاودێریی پزیشکیدا بن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ