راوێژکاری پارێزگاری سەلاحەدین: سەرۆککۆمار سەردانی پارێزگاکەمان دەکات

 

رۆژی سێشەممە 3-1-2023، کاوە شێخانی، راوێژکاری ئەمنی و سەربازیی پارێزگاری سەلاحەدین بە تۆڕی میدیایی رووداوی راگەیاند: "ئەمڕۆ شاندێکی پارێزگای سەلاحەدین بە سەرۆکایەتیی ئیسماعیل خزەیر هلوب، من [کاوە شێخانی] و ژمارەیەک بەرپرسی دیکە سەردانی لەتیف رەشید، سەرۆککۆماری عێراقمان کرد بۆ زانیاری پێدانی لەبارەی ژمارەیەک پرسی پەیوەست بە پارێزگاکە لە رووی خزمەتگوزاری، ئاوەدانکردنەوە، گەڕانەوەی ئاوارەکان، پرسە ئەمنییەکان و ئەو پێشێلکارییە ئەمنییانەی لە رابردوودا لە پارێزگاکە و لە خوورماتوو روویاندا." 

 

کاوە شێخانی گوتی: "سەرۆککۆماری عێراق ئامادەیی نیشاندا بۆ پشتیوانیکردنی پارێزگای سەلاحەدین و پێکەوەژیانی پێکهاتەکانی و ئاماژەی بۆ گرنگیی ئەو ناوچەیە کرد." 

 

راوێژکارەکەی پارێزگاری سەلاحەدین گوتی: "سەرۆککۆماری عێراق بڕیاریدا لەماوەی یەک بۆ دوو مانگی داهاتوودا سەردانی پارێزگای سەلاحەدین بکات بۆ لەنزیکەوە ئاگاداربوون لە دۆخی پارێزگاکە."

 

سەلاحەدین یەکێکە لە پارێزگاکانی نێوەڕاستی عێراق و تکریت سەنتەرەکەیەتی. بەشێک لە ناوچە کوردستانییەکانی دەرەوەی ئیدارەی هەرێمی کوردستان دەکەونە پارێزگاکە.