رووداو دیجیتاڵ
بزووتنەوەی سادیقوون لە پەرلەمانی عێراق، کە سەر بە بزووتنەوەی عەسائیبی ئەهلی حەقە رایگەیاند، پێشوازی لە سازکردنی دیبەیت لە نێوان نوێنەرانی رەوتی سەدر و چوارچێوەی هاوئاهەنگی دەکەن.
مەحموود روبەیعی، گوتەبێژی بزووتنەوەی سادیقوون کە یەکێکە لە لایەنەکانی نێو چوارچێوەی هاوئاهەنگیی شیعە، ئەمڕۆ یەکشەممە 21-08-2022، لە هەژماری بزووتنەوەکەدا لە فەیسبووک رایگەیاند: "دیبەیتی ئاشکرا و راستەوخۆ یەکێکە لە دیموکراسیترین و روونترین شێوازەکان بۆ جەماوەر و بابەتە شاراوەکان ئاشکرا دەکات".
مەحموود روبەیعی گوتیشی: "من پشتیوانی لە بانگەواز بۆ دیبەتی لەو شێوەیە دەکەم لە نێوان نوێنەرێکی سەرکردایەتیی رەوتەکە و نوێنەرێکی سەرکردەکانی چوارچێوە... بەڵام دەبێ لە ئەنجامی دیبەیتەکە بە بەڵگەکان و پەنابردن بۆ دەستوور و یاسا و کۆتاییهێنان بەو قەیرانە رازی بین".
ئەم گوتانەی گوتەبێژی بزووتنەوەی سادیقوون دوای رۆژێک هات لە تویتێکی موقتەدا سەدر، رێبەری رەوتی سەدر کە دوێنێ رایگەیاند: "پێشنیازێکمان پێشکێشی نەتەوە یەکگرتووەکان کرد بۆ سازکردنی دیبەیتێکی ئاشکرا بە پەخشی راستەوخۆ لەگەڵ هەموو لایەنە سیاسییەکان، کەچی وەڵامەکەیان بێسوود بوو. وەڵامەکەیان هیچ شتێکی تێدا نەبوو سەبارەت بە چاکسازی و داواکارییەکانی شۆڕشگێڕان و ئەوەی کە گەل بە دەستییەوە دەناڵێنێت. ئەوان هیچ گرنگییەکیان بەوە نەدا کە دەگوزەرێت".
گرژییەکانی نێوان رەوتی سەدر و چوارچێوەی هاوئاهەنگی بەردەوامن، لایەنگرانی هەردوولا مانگرتنیان لە بەغدا راگەیاندووە. لایەنگرانی رەوتی سەدر کە لە باڵەخانەی پەرلەمان مانیان گرتووە داوای هەڵوەشاندنەوەی پەرلەمان و بەڕێوەچوونی هەڵبژاردنێکی دیکەی پێشوەخت دەکەن، چوارچێوەی هاوئاهەنگیش دەڵێت: بە مەرجی پێکهێنانی حکومەتی نوێ و گۆڕینی یاسا و کۆمیسیۆنی هەڵبژاردنەکان بەو داوایە رازی دەبن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ