راهی نەجم، گەنجێکی پرۆگرامساز

لەم بەرنامەیەی پلان Aدا، راهی نەجم حەسەن، گەنجێکی تەمەن 16 ساڵی خەڵکی سۆران، میوان بوو. راهی قوتابی و پڕۆگرامسازێکی بەهرەمەندە کە لە تەمەنێکی کەمەوە دەستی بە کاری پڕۆگرامسازی کردووە و چەندین سیستەمی جۆراوجۆری دروستکردووە، لەوانە سیستەمی کڕین و فرۆشتن، سیستەمی کاشێر و چێشتخانە. پلانی سەرەکی و خەونی ئەو ئەوەیە کە لەڕێگەی پڕۆژە تەکنەلۆجییەکانەوە خزمەت بە کوردستان بکات و وڵاتەکەی بەرەو پێش ببات.

یەکێک لە پڕۆژە هەرە دیارەکانی راهی، دروستکردنی سیستەمێکی گەشتوگوزارییە بۆ کوردستان. ئامانج لەم سیستەمە ئەوەیە کە گەشتیارانی ناوخۆ و دەرەوەی کوردستان بتوانن بە ئاسانی شوێنە گەشتیارییەکان بدۆزنەوە و زانیارییان لەسەر وەربگرن. راهی ئاشکرای کرد کە ژینگەی جوگرافیی جوانی سۆران و بوونی سەوزایی و شوێنی گەشتیاریی زۆر، ئیلهامبەخش بووە بۆ ئەوەی ئەم پڕۆژەیە هەڵبژێرێت. ئەو بۆخۆی پەیوەندی بە هۆتێل، مۆتێل و چێشتخانەکانەوە دەکات بۆ وەرگرتنی زانیاری و داتاکان و پاشان دەیانخاتە ناو سیستەمەکەیەوە.

لە سەرەتای دەستپێکردنی کارەکەیدا، راهی رووبەڕووی گاڵتەپێکردنی هاوڕێ و دەوروبەری بووەتەوە و تەنانەت خۆیشی گومانی لە تواناکانی خۆی هەبووە. ئەو دەڵێت، "هەموویان بە من پێکەنین، من خۆشم بە خۆم پێکەنیم، باوەڕیان بە من نەبوو." بەڵام دوای سەرکەوتنی یەکەم هەنگاوەکانی، توانیویەتی باوەڕ بەخۆی بهێنێت. یەکێکی دیکە لە بیرۆکە مرۆییەکانی ئەو ئەوەیە کە ئەگەر بۆ یەک رۆژ کۆنترۆڵی سیستمی هەموو جیهانی بکەوێتە دەست، یاسایەک دادەنێت کە "هەر سیستمێک دابنرێت لە خزمەتی مرۆڤایەتیدا بێت و هیچ زیانێکی نەبێت."

راهی پلانی هەیە لە داهاتوودا سیستەمی گەورەتر و پێشکەوتووتر دروست بکات بۆ خزمەتکردنی زیاتری کوردستان. ئەو باوەڕی وایە کە "داهاتووی ئەم جیهانە لەسەر ئایتی و پڕۆگرامسازی بەرهەم هێنراوە." ئامۆژگاریی بۆ گەنجان ئەوەیە کە پەرە بەخۆیان بدەن و کار لەسەر بواری ئایتی بکەن. سەبارەت بە داهاتووی خۆی، راهی پلانی هەیە بۆ خوێندن بچێتە دەرەوەی وڵات، بەڵام جەخت دەکاتەوە کە "دەچم دەخوێنم و دێمەوە خزمەتی وڵاتەکەی خۆمی پێ دەکەم،" چونکە لای وایە "کوردستان خۆشترە لە هەموو وڵاتێک." ئەو دەیەوێت ببێتە ئەو کوردەی کە لە داهاتوودا "لە دیوێکی ترەوە کورد بە جیهان دەناسێنێت."

پلان A، بەرنامەیەکی گەنجانەی مەیدانییە، لێکۆلینەوە دەکات لە جیاوازیی نێوان ئەو شتانەی گەنجان هیوای بۆ دەخوازن و ئەو ژیانەی تێیدان لە هەرێمی کوردستان و عێراق. هەر ئەڵقەیەک دەرفەت دەداتە گەنجێک باسی خەونەکانی بۆ داهاتوو بکات، وەکو کار، خێزان، سەقامگیری، کۆچ. پێشکێشکار گەنجان رووبەڕووی ئەو راستییانە دەکاتەوە کە هیوا و خەونەکانیان دروست دەکەن، دەبنە هۆی دواخستنی خەونەکانیان، یان هەندێکجار رێگرییان لێدەکرێت. بەرنامەکە چیرۆکی راستەقینەی ژیانی خوێندکارانی زانکۆ، فرۆشیارانی سەر شەقام، میوزیکژەنان، سەرتاش، کرێکارانی کارگەکان، خاوەنکارە گەنجەکان تۆمار دەکات.