لە گۆڕینی پرۆگرامی خوێندنەوە تاوەکو هەڕەشەی ئەتۆمی.. هەمووی لە رۆژی هیوا جەمال

دەتەوێت بزانیت داهاتووی پەروەردە لە کوردستان بەرەو کوێ دەڕوات؟ ئایا نیگەرانی هەڵگیرسانی جەنگێکی نوێی ئەتۆمیی؟ ئەمڕۆ لە رۆژی هیوا جەمال، وەڵامی پرسیارەکانت لەبارەی گۆڕانکارییەکانی نێوخۆیی و جیهانی وەردەگریتەوە. لە هەڤپەیڤینێکی تایبەتەوە لەگەڵ وەزیری پەروەردە، تاوەکو دەگاتە دواین پێشهاتەکانی ململانێی زلهێزەکان و چیرۆکە مرۆییە کاریگەرەکان.

 شۆڕشی پەروەردە لە کوردستان

لە هەڤپەیڤینی، د. ئالان حەمەسەعید، وەزیری پەروەردەی هەرێمی کوردستان، بۆ یەکەمجار وردەکاریی گۆڕانکارییە گەورەکان لە پرۆگرامی خوێندن ئاشکرا دەکات. وەزیر وەڵامی ئەو دەنگۆیانە دەداتەوە کە باس لە دەستکاریکردنی وانەی پەروەردەی ئیسلامی دەکەن و جەخت دەکاتەوە: "پەروەردەی ئیسلامی نە گۆڕاوە و نە دەگۆڕدرێت." هاوکات، باسی شۆڕشێکی دیجیتاڵی لە کەرتەکەدا دەکات، لەوانە سیستمی "ئی-پەروەردە" کاروباری مامۆستا و قوتابی ئاسان دەکات، و پلاتفۆرمی "قوتابخانەکەم" کە بە سوودوەرگرتن لە ژیری دەستکرد، خوێندن لە هەرێمی کوردستان دەگەیەنێتە ئاستێکی نوێ.

مژدەیەک بۆ خانەنشینان و چاوەڕوانییەک لە تورکیا

خەمی هەزاران خانەنشینی سەربازی کۆتایی هات! بە فەرمانی سەرۆکوەزیرانی هەرێمی کوردستان، ئەمڕۆ مووچەی ئەو پێشمەرگە و ئەفسەرانە خەرج دەکرێت کە ماوەی ساڵێک بوو چاوەڕێ بوون. لە بەرنامەکەدا وردەکاریی زیاتر بزانە.. لەلایەکی دیکەوە، لە تورکیا، چارەنووسی پرسی کورد چاوەڕوانی هەفتەی داهاتوو دەکات، دوای ئەوەی کۆبوونەوەی کۆمیسیۆنی تایبەت بەم پرسە دواخرا، کە بڕیار بوو باسی سەردانیکردنی عەبدوڵڵا ئۆجەلان بکات.

رۆژهەڵاتی کوردستان: لە پڕۆژەی بۆشایی ئاسمانەوە تاوەکو تێکدانی بژێوی

هاوکات لەگەڵ سەردانەکەی مەسعود پزیشکیان بۆ سنە، رۆژهەڵاتی کوردستان وێنەیەکی پڕ لە ناکۆکی نیشان دەدات. لە لایەک، حکومەتی ئێران پڕۆژەیەکی ستراتیژیی گەورە رادەگەیەنێت کە دروستکردنی وێستگەیەکی بۆشایی ئاسمانە لە سەڵماس، بەڵام لە لایەکی دیکەوە، هێزە ئەمنییەکان دەست بەسەر 100 "چەکی شۆڕش" و هەزاران لیتر سووتەمەنیی قاچاخدا دەگرن. لە هەمان کاتدا، لە دڵی شاری سنە، شارەوانی شوێنی کاری دەستفرۆشەکان تێکدەدات و سەرچاوەی بژێوی دەیان خێزان دەخاتە مەترسییەوە.

ململانێی زلهێزەکان: لە نیویۆرکەوە تا مۆسکۆ

لە واشنتن، دۆناڵد ترەمپ پەیامێکی ئاگرینی ئاراستەی زوهران مامدانی، سەرۆکی نوێی شارەوانیی نیویۆرک کرد و هۆشداریی پێدا: "هاوکاریمان نەکەیت، زۆر شت لەدەست دەدەیت!" بەڵام مەترسییە گەورەکە لە شوێنێکی دیکەیە. پێشبڕکێی ئەتۆمی جارێکی دیکە گەرم بووەتەوە؛ پووتین فەرمانی ئامادەکاری بۆ تاقیکردنەوەی ئەتۆمی دەرکردووە، ترەمپ هەڕەشەی وەڵامدانەوە دەکات، و چین بە بێدەنگی پەرە بە تەکنەلۆژیایەکی نوێ دەدات. ئایا جیهان لەبەردەم شەڕێکی ساردی نوێدایە؟ لە بەرنامەکەدا بە وردی شیکاریی ئەم چەکە ترسناکە و کاریگەرییەکانی دەکەین.
ئەم هەموو رووداو و شیکارییە قووڵە و زیاتر لە بەرنامەی ئەمڕۆدا ببینە. بۆ بینینی تەواوی چاوپێکەوتن و راپۆرتەکان، کلیک لە ڤیدیۆکە بکە و لەگەڵمان بە!

رۆژی هیوا جەمال

شۆیەکی 40 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).