هەفتەی گۆڕانکارییە گەورەکان لە رۆژی هیوا جەمال

ئەم هەفتەیە، رەنگە یەکێک لە ئەو هەفتانە بێت کە بڕیارە قورسەکانی تێدا دەدرێت. لە کاتێکدا جیهان چاوی لە واشنتن و دیمەشقە، لێرە لە هەرێمی کوردستان چیرۆکی سنوورەکان و بژێوی خەڵک دەبنە رۆژەڤی سەرەکی. "رۆژی هیوا جەمال" بەدواداچوونی ورد بۆ ئەو دۆسێیانە دەکات کە راستەوخۆ کار دەکەنە سەر ژیانی خەڵک.

بەغدا و هەولێر: مەلەفی مووچە و پێکهێنانی حکومەت

لە گۆڕەپانی سیاسیی عێراق و هەرێمی کوردستان، چەندین کاژێری یەکلاکەرەوە چاوەڕێمان دەکەن. وەزارەتی دارایی هەرێمی کوردستان ئامادەکاری دەکات بۆ ناردنی 120 ملیار دینار، تاوەکو لە بەرامبەردا بەغدا مووچەی مانگی 10 رەوانە بکات. هاوکات، مەکتەبی سیاسیی یەکێتی، لایەنە سوننەکان و چوارچێوەی هاوئاهەنگی کۆدەبنەوە بۆ یەکلاکردنەوەی پۆستە سیادییەکان و سەرۆکوەزیرانی داهاتوو. هەر لەم چوارچێوەیەدا، محەممەد شیاع سوودانی بڕیارێکی گرنگی دا بۆ دامەزراندنی وەرگرانی مووچەی چاودێریی کۆمەڵایەتی لە وەزارەتی پەروەردە، وەک هەنگاوێک بۆ کەمکردنەوەی بێکاری.

کورد لەسەر ئاستی جیهانی: دکتۆر بەرهەم و نەخشەی گووگڵ

دوای کێبڕکێ لەگەڵ 12 کەسایەتی جیهانی، دکتۆر بەرهەم ساڵح وەک یەکەم کورد پۆستی کۆمیسیاری باڵای نەتەوە یەکگرتووەکانی بۆ کاروباری پەنابەران (UNHCR) وەرگرت؛ ئەرکێک کە پاراستنی 123 ملیۆن ئاوارەی جیهانی دەخاتە ئەستۆی.

بەڵام لە دیوێکی دیکەدا، "گووگڵ ماپس" پاشەکشەی لە نەخشەی هەرێمی کوردستان کرد و کەرکووکی لە سنووری هەرێمی کوردستان دەرهێنایەوە. هیوا جەمال لەم بەرنامەیەدا وردەکاریی ئەو گوشارە سیاسی و تەکنیکییانە ئاشکرا دەکات کە بوونە هۆی ئەم گۆڕانکارییە.

تەوەرێکی گەرم: سووریا و ئەمریکا

بە هاتنی دۆناڵد ترەمپ، گۆڕانکارییەکان خێرا بوون. هەڵگرتنی سزاکانی (یاسای قەیسەر) لەسەر سووریا، وەک ئەحمەد شەرع ئاماژەی پێدا، سەرەتایەکی نوێیە بۆ بووژانەوەی ئابووریی ناوچەکە. بەڵام هاوکات، فەرماندەیی ناوەندیی ئەمریکا (CENTCOM) هێرشێکی چڕی کردە سەر پێگەکانی داعش لە سووریا. لەم نێوەندەدا، مارک ساڤایا، نوێنەری ترەمپ، گەشتەکەی بۆ ناوچەکە دەستپێدەکات .

پرۆسەی ئاشتی لە تورکیا

لە باکووری کوردستان و تورکیا، پڕۆسەی ئاشتی هەنگاوی نوێ دەنێت. شاندی ئیمراڵیی دەم پارتی لەگەڵ ئاکپارتی و جەهەپە کۆدەبنەوە. ئەمە لە کاتێکدایە کە جەنگیز چاندار رەخنەی توند لە هاکان فیدان وەزیری دەرەوەی تورکیا دەگرێت و داوای زمانێکی نەرمتر بەرامبەر کوردان دەکات. لە لایەکی دیکەوە، هەپەگە ناسنامەی 6 گەریلای ئاشکرا کرد، لە کاتێکدا تورکیا بەدەست قەیرانی کرێی خانوو و گرانیی بژێوییەوە دەناڵێنێت.

مرۆڤایەتی و ژینگە: لە دەربەندیخانەوە بۆ بەڕازیل

لەسەر ئاستی ناوخۆ، گەنجانی دەربەندیخان بە کۆکردنەوەی زیاتر لە 38 ملیۆن دینار و 200 پاکێجی گەورە هاوکارییان گەیاندە 200 خێزانی چەمچەماڵ، شۆرش و تەکیە، کە نموونەیەکی باڵای هاوکاریی کۆمەڵایەتییە.

لەسەر ئاستی جیهانیش، ساڵی 2025 وەک ساڵی "لوتکەی هاوکاری ئاژەڵ و مرۆڤ" دەناسرێت، لە پشکنینی پڵنگەکانەوە تا مشکی میندۆز. هەروەها شەقامی "رووا دو سێنادۆ" لە بەڕازیڵ وەک سەرنجڕاکێشترین شەقامی جیهان دەستنیشان کرا.

کۆتایی و شەوی یەڵدا

بەرنامەکە بە تیشکخستنە سەر درێژترین شەوی ساڵ کۆتایی دێت. لە کاتێکدا زەردەشتییەکان و ناوەندە رۆشنبیرییەکان ئاهەنگی شەوی یەڵدا دەگێڕن، هیوا جەمال بەیتە بەناوبانگەکەی نالی دەخوێنێتەوە و جەخت لەوە دەکاتەوە کە ئەم شەو تەنیا کات نییە، بەڵکو مێژوویەکی کولتووریی قووڵە.

ئەمانە و چەندین دۆسێی دیکەی هەستیار، لە بەرنامەی رۆژی هیوا جەمال" بە ڤیدیۆ و گرافیکی تایبەت ببینن.


رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).