چوارچێوەی هاوئاهەنگی بۆ پێكهێنانی حكومەت دەجووڵێت و بەغدا بەڵێنی ناردنی مووچە دەدات

چوارچێوەی هاوئاهەنگی بۆ پێكهێنانی حكومەت دەجووڵێت، بەغدا بەڵێنی ناردنی مووچە دەدات و ئەنجوومەنی ئاسایش پلانی غەززە پەسند دەکات

لەگەڵ راگەیاندنی ئەنجامی کۆتایی هەڵبژاردنی ئەنجوومەنی نوێنەرانی عێراق، چوارچێوەی هاوئاهەنگی شیعەکان خۆی وەک گەورەترین فراکسیۆن راگەیاند و دەستی بە هەنگاوەکانی پێکهێنانی حکومەت کرد، هاوکات وەزیری دارایی عێراق دڵنیایی دەدات لە ناردنی مووچەی مانگی نۆی فەرمانبەرانی هەرێمی کوردستان. لە ئاستی نێودەوڵەتیشدا، ئەنجوومەنی ئاسایش پلانێکی ئەمریکای بۆ غەززە پەسند کرد و لە تورکیاش، کۆمیسیۆنی پەرلەمانی بۆ چارەسەری پرسی کورد لەگەڵ بەرپرسانی باڵای ئەمنی کۆدەبێتەوە.

تەیف سامی: مووچەی مانگی نۆی هەرێمی کوردستان لەگەڵ مووچەی مانگی 11ی عێراق دەنێرین

تەیف سامی، وەزیری دارایی عێراق، دڵنیایی دەداتە هەرێمی کوردستان و رایدەگەیەنێت کە هیچ کێشەیەک لەسەر ناردنی مووچەی مانگی نۆی فەرمانبەران نییە. بەپێی ئەو زانیاریانەی لە بەغداوە دەست تۆڕی میدیایی رووداو کەوتوون، دوای کۆبوونەوەی ئەنجوومەنی وەزیرانی عێراق، لە وەڵامی پرسیاری وەزیرێکی کورددا، تەیف سامی جەختی کردووەتەوە، "هیچ کێشەیەک نییە و لەگەڵ دابەشکردنی مووچەی ئەم مانگەی فەرمانبەرانی عێراق، مووچەی هەرێمی کوردستان خەرج دەکرێت."

بەرنامەی (رۆژی هیوا جەمال) زانیویەتی کە شەوی پێشووتر د. فوئاد حوسێن، وەزیری دەرەوەی عێراق، لەگەڵ محەممەد شیاع سوودانی، سەرۆکوەزیرانی کاربەڕێکەر، قسەی کردووە و سوودانیش داوای لە وەزیری دارایی کردووە مووچەکە خەرج بکات. لە بەرامبەردا، سەرچاوەیەک لە وەزارەتی دارایی هەرێمی کوردستان رایگەیاندووە، هەر کاتێک بڕیاری خەرجکردنەکە لە بەغداوە دەرچوو، هەرێمی کوردستان ئامادەیە 120 ملیار دیناری داهاتی نانەوتی بنێرێت. بەپێی ئەم پێشهاتانە، چاوەڕوان دەکرێت هەفتەی داهاتوو پارەی مووچەکە بگاتە هەرێمی کوردستان.

شیعە 175، سوننە 71 و کورد 58 کورسی بەدەستهێنا

کۆمیسیۆنی باڵای سەربەخۆی هەڵبژاردنەکانی عێراق ئەنجامی کۆتاییی هەڵبژاردنەکانی راگەیاند. بەگوێرەی بەدواداچوونی رووداو، لیست و هاوپەیمانیی شیعەکان 175 کورسی، سوننە 71 کورسی و کوردیش 58 کورسیی بەدەستهێناوە. کورسییەکانی دیکەی ئەنجوومەنەکەش بەر سەربەخۆ و کۆتاکان دەکەون، کە دەتوانن ببنە پارسەنگی هاوکێشە سیاسییەکان.

چوارچێوەی هاوئاهەنگی خۆی وەک گەورەترین فراکسیۆن راگەیاند

لەیەکەمین کاردانەوەدا، چوارچێوەی هاوئاهەنگی  شیعەکان پێکهێنانی گەورەترین فراکسیۆنی پەرلەمانی راگەیاند و دوو لیژنەی بۆ دیاریکردنی سەرۆکوەزیرانی داهاتوو و داڕشتنی کارنامەی حکومەت پێکهێنا. شێروان شەمێرانی، چاودێری سیاسی، لە بەرنامەی (رۆژی هیوا جەمال) رایگەیاند، "کۆبوونەوەکە پەیامێکی روونی هەبوو کە حکومەتی داهاتوو حکومەتی محەممەد شیاع سوودانی نییە بە تەنیا، بەڵکو حکومەتی ماڵی شیعەیە." ئەو پێشیوابوو کە "رکابەرییەکی زۆر سەخت لەنێو ماڵی شیعەدا هەیە و نووری مالیکی بووەتە سەرسەخترین دژی سوودانی."

چوار سیناریۆ لەپشت کۆتاییهێنان بە خولی پەرلەمانی عێراقەوە

بڕیاری دادگەی فیدراڵی بۆ کۆتاییهێنان بە کاری خولی پێنجەمی پەرلەمان، کە پێچەوانەی خولەکانی پێشوو بوو، چوار سیناریۆی لەپشتەوەیە:
1.ترس لە بەهێزبوونی سوودانی: هەندێک لایەنی شیعە دەیانەوێت دەسەڵاتەکانی سوودانی سنووردار بکەن.
2.ئاڵنگارییە گەورەکان: لەکارخستنی پەرلەمان بۆ کۆنтроڵکردنی دۆخی هەستیاری ناوچەکە.
3.ترس لە زۆرینەی پەرلەمانی: رێگرتن لە تێپەڕاندنی یاسای بەرژەوەندیخوازانە لە ماوەی کاربەڕێکەریدا.
4.لایەنگریی دادگەی فیدراڵی: گومان لە بێلایەنیی دادگە و کاریگەریی لەسەر پێکهێنانی حکومەتی نوێ.

نزیکەی 730 هەزار دەنگی پووچەڵ تۆمارکرا

بەپێی ئامارە فەرمییەکان، 729,923 دەنگ لە هەڵبژاردنەکاندا پووچەڵ بوونەتەوە. زۆرترین رێژەی دەنگی پووچەڵ لە پارێزگای سلێمانی بووە بە 137,611 دەنگ، دوای ئەویش هەولێر بە 116,900 دەنگ دێت.

کۆمیسیۆنی چارەسەریی تورکیا لەگەڵ سێ وەزیر کۆدەبێتەوە

ئەمڕۆ کۆمیسیۆنی یەکڕیزیی نیشتمانی لە پەرلەمانی تورکیا، کە بۆ چارەسەری پرسی کورد پێکهاتووە، لەگەڵ وەزیرانی ناوخۆ، بەرگری و سەرۆکی میت کۆدەبێتەوە. بۆڵەنت کایا، ئەندامی کۆمیسیۆنەکە، لە بەرنامەی (رۆژی هیوا جەمال) رایگەیاند، "ئەمڕۆ دوایین کۆبوونەوەی قۆناخی گوێگرتنە و دواتر دەست بە نووسینەوەی راپۆرتێک دەکەین کە ببێتە بنەمای یاسایی بۆ چەکدانان و هەڵوەشاندنەوەی پەکەکە." کایا رەتیکردەوە کە سەردانی ئیمراڵی لە کارنامەی کۆبوونەوەکەدا بێت.

ئەنجوومەنی ئاسایش پلانی ئەمریکای بۆ غەززە پەسەند کرد

ئەنجوومەنی ئاسایشی نەتەوە یەکگرتووەکان پرۆژەبڕیارێکی ئەمریکای پەسەند کرد کە رێگەخۆشدەکات بۆ ناردنی هێزێکی نێودەوڵەتی بۆ کەرتی غەززە و دامەزراندنی "ئەنجوومەنێکی ئاشتی" بە سەرۆکایەتیی دۆناڵد ترەمپ. بڕیارەکە بە 13 دەنگی بەڵێ پەسەند کرا، لە کاتێکدا رووسیا و چین دەنگیان نەدا.

ئەمریکا ئێف-35 بە سعودیە دەفرۆشێت

 دۆناڵد ترەمپ فرۆشتنی فڕۆکەی جەنگیی پێشکەوتووی جۆری ئێف-35ی بە سعودیە راگەیاند، کە بە وەرچەرخانێکی گەورە لە سیاسەتی ئەمریکا دادەنرێت.

24  بەرپرس و کارمەندی مهاباد سزادران

دەسەڵاتی دادی ورمێ سزای بەسەر 24 بەرپرسی شارەوانی و ئەنجوومەنی پێشووی مهاباددا سەپاند بە تۆمەتی گەندەڵی و وەرگرتنی بەرتیل.

کیژانی سنە و لوڕستان لە فێستیڤاڵێکی ئێران خەڵات کران

 دوو گرووپی میوزیکی ژنانی کورد لە فێستیڤاڵێکی هونەری لە دوورگەی کیش بەشدارییان کرد و گرووپی "کیژانی سنە" خەڵاتی باشترین "هەڵبەست، میوزیک و گۆرانی"یان بەدەستهێنا.

ئەمریکا "فیفا پاس"ی بۆ ئاسانکاریی ڤیزای مۆندیال راگەیاند

دۆناڵد ترەمپ و سەرۆکی فیفا رایانگەیاند، هەرکەسێک بلیتی مۆندیال بکڕێت، ئاسانکاریی بۆ دەکرێت لە وەرگرتنی ڤیزای ئەمریکا.

ترەمپ: لە ماکدۆناڵدز پەتاتەم سوور دەکردەوە

دۆناڵد ترەمپ لە گوتارێکیدا بە شانازییەوە باسی ئەزموونی کارکردنی خۆی لە رێستۆرانتی ماکدۆناڵدز کرد و خۆی وەک یەکەم "کارمەندی پێشووی سوورکردنەوەی پەتاتە" ناساند کە بووەتە سەرۆکی ئەمریکا.

رۆژی هیوا جەمال

شۆیەکی 40 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).