تەقینەوە تاران دەهەژێنێت و جەنگ سیستەمی خوێندن لە هەرێمی کوردستان دەگۆڕێت

لە کاتێکدا هەرێمی کوردستان هەنگاوە کارگێڕییەکانی بۆ کۆتاییهێنان بە کێشەی مووچە دەستپێکردووە، ئاڵۆزییە سەربازییەکانی ناوچەکە کاریگەریی راستەوخۆیان لەسەر ژیانی رۆژانەی هاووڵاتییان دروستکردووە و پرۆسەی خوێندنیان گۆڕیوە بۆ ئۆنلاین. هاوکات لە بەغدا کێشەی سەرۆککۆمار و لە تاران دەنگی تەقینەوەکان بوونەتە سەردێڕی هەواڵە گەرمەکان.

لیستی مووچە و تەرازووی پێداچوونەوە گەیشتنە بەغدا

ئەمڕۆ لیستی مووچەی مانگی ئاداری فەرمانبەرانی هەرێمی کوردستان و راپۆرتی تەرازووی پێداچوونەوە، رادەستی فەرمانگەی ژمێریاریی وەزارەتی دارایی عێراق کرا. بەمەش سێ بەشی رێکارە کارگێڕییەکان بۆ خەرجکردنی مووچە تەواو بوون. تەنیا رێکارێک کە ماوەتەوە، رادەستکردنی داهاتی ناوخۆی هەرێمی کوردستانە بە حکومەتی فیدراڵ، کە خەمڵاندنەکان ئاماژە بە 120 ملیار دینار دەکەن.

بەهۆی مەترسییەکانی جەنگ؛ خوێندن کرا بە ئۆنلاین

حکومەتی هەرێمی کوردستان بڕیاریدا پرۆسەی خوێندن لە سەرجەم ناوەندەکانی سەر بە وەزارەتی پەروەردە و خوێندنی باڵا بکاتە "ئۆنلاین" و "دیجیتاڵی". ئەم بڕیارە بەهۆی دۆخی نەخوازراوی ناوچەکە و هێرشە درۆنی و موشەکییەکان دراوە. زانکۆی سەلاحەدین سەرجەم تاقیکردنەوەکانی دواخست و قوتابیان دەتوانن لە رێگەی پلاتفۆرمە دیجیتاڵییەکان و تەلەفزیۆنە پەروەردەییەکانەوە بەردەوام بن لە خوێندن.

هەڵبژاردنی سەرۆککۆماری عێراق بۆ کاتێکی دیکە دواخرا

هەوڵەکان بۆ هەڵبژاردنی سەرۆککۆماری نوێی عێراق لە دانیشتنی ئەمڕۆی پەرلەماندا شکستی هێنا، ئەمەش دوای ئەوەی ژمارەیەک پەرلەمانتار واژۆکانیان کشاندەوە. بەگوێرەی زانیارییەکان، مۆڵەتی 10 رۆژ دراوەتە لایەنەکان بۆ رێککەوتن، و رۆژی 8ی نیسان وەک کۆتا وادە بۆ یەکلاییکردنەوەی ئەو پۆستە دیاریکراوە.

چوارچێوەی هاوئاهەنگی: هێرش بۆ سەر ماڵی سەرۆکی هەرێمی کوردستان رەتدەکەینەوە

چوارچێوەی هاوئاهەنگی لە کۆبوونەوەیەکدا لە نووسینگەی مەندەلاوی رایگەیاند، هێرشکردنە سەر ماڵی سەرۆکی هەرێمی کوردستان نیشانەیەکی مەترسیدارە و هەوڵێکی دەرەکییە بۆ تێکدانی سەقامگیری. هەروەها جەختیان کردەوە کە نابێت ئاسمانی عێراق بۆ کردەوەی دوژمنکارانە دژی وڵاتانی دراوسێ بەکاربهێنرێت.

گەشتەکەی سەرۆککۆمار بۆ فەرەنسا پەکیکەوت

د. عەبدوللەتیف رەشید، سەرۆککۆماری عێراق بڕیاربوو بە سەردانێکی فەرمی بچێتە پاریس، بەڵام بەهۆی داخرانی ئاسمانی عێراق پاش هەڵگیرسانی جەنگی ئێران، گەشتەکە ئەنجام نەدرا. سەرۆکایەتی کۆمار داوای فڕۆکەیەکی تایبەتی کردبوو بۆ گواستنەوەی شاندەکە، بەڵام دۆخی ئەمنی رێگر بوو.

زنجیرەیەک تەقینەوە تاران و چەند شارێکی ئێرانی هەژاند

بەرەبەیانی ئەمڕۆ تەقینەوەی ئێجگار بەهێز لە تاران، کەرەج، قوم و تەورێز بیستران. هێرشەکان بنکە سەربازییەکان، کارگەکانی باتری و یەکە پترۆکیمیاییەکانیان کردووەتە ئامانج. لە بەندەر عەباسیش کۆگەکانی سووتی فڕۆکەخانە بۆردوومان کران.

پاکستان میوانداریی گفتوگۆکانی ئێران و ئەمریکا دەکات

وەزیری دەرەوەی پاکستان رایگەیاند کە وڵاتەکەی ئامادەکاری دەکات بۆ میوانداریکردنی گفتوگۆی نێوان تاران و واشنتن. پێشنیازەکان کە هی وڵاتانی ناوچەکەشن، پێشتر رەوانەی کۆشکی سپی کراون و جەی دی ڤانس، جێگری سەرۆکی ئەمریکا لەسەر هێڵە بۆ نێوەندگیرییەکە.

ئیسرائیل بودجەی جەنگی 2026ی پەسندکرد

پەرلەمانی ئیسرائیل بودجەی ساڵی 2026ی بە بڕی 270 ملیار دۆلار پەسندکرد. لەم بودجەیەدا خەرجییە سەربازییەکان بۆ ئاستێکی پێوانەیی بەرزکراونەتەوە و تەنیا بودجەی وەزارەتی بەرگری 45 ملیار دۆلارە، ئەمەش وەک ئامادەکاری بۆ جەنگێکی درێژخایەن.

هۆشداریی چوار وڵاتی ئەورووپا بە ئیسرائیل

بەریتانیا، فەرەنسا، ئەڵمانیا و ئیتاڵیا هۆشداریی تووندیان دایە ئیسرائیل لەبارەی هەوڵەکانی بۆ پەسندکردنی یاسای "لەسێدارەدان". ئەو وڵاتانە دەڵێن ئەم یاسایە پێچەوانەی پرەنسیپە دیموکراسییەکانە و جیاکاریی تێدایە.

رووسیا بە بەردێک دوو چۆلەکەی کوشت

سەرەڕای سزاکان، کەشتییەکی نەوتهەڵگری رووسی بە 730 هەزار بەرمیل نەوتەوە گەیشتە کەناراوەکانی کوبا. رووسیا بەم کارە هەم سزاکانی ئەمریکای شکاند، هەم نەوتی گەیاندە هاوپەیمانەکەی کە دوای دەستگیرکردنی مادۆرۆ تووشی قەیرانی وزە بووە.

ئێران مافی نیشتەجێبوونی 1200 ئیماراتی هەڵوەشاندەوە

وەک وەڵامێک بۆ هەڵوەشاندنەوەی مافی نیشتەجێبوونی ئێرانییەکان لە ئیمارات، دەسەڵاتی دادوەریی ئێران مافی نیشتەجێبوونی 1200 هاووڵاتیی ئیماراتی هەڵوەشاندەوە و هەفتەیەک مۆڵەتی پێدان خاکی وڵاتەکەی جێبهێڵن.

هەڵگرتنی قەدەخەی هاوردەکردنی تەماتە لە هەرێمی کوردستان

وەزارەتی کشتوکاڵی هەرێمی کوردستان بڕیاریدا قەدەخەی سەر هاوردەکردنی تەماتە هەڵبگرێت. ئەم بڕیارە دوای ئەوە هات کە نرخی یەک کیلۆ تەماتە لە بازاڕەکاندا گەیشتە 1500 دینار و بەرهەمی ناوخۆ کەمبووەوە.

پێنج شۆکی وزەی جیهانی لە ماوەی 50 ساڵدا

شارەزایان ئاماژە بەوە دەکەن کە تەنگژەی ئێستای گەرووی هورمز پێنجەمین شۆکی گەورەی وزەیە لە مێژووی هاوچەرخدا. داخستنی ئەم گەرووە کە 20%ی نەوتی جیهانی پێدا تێدەپەڕێت، مەترسیدارترین شۆکە لە دوای ساڵی 1973وە.

پەککەوتنی گەشتەکەی سەرۆککۆماری عێراق بۆ فەرەنسا

دواین زانیارییەکان ئاماژە بەوە دەکەن کە د. عەبدوللەتیف رەشید بڕیاربووە سەردانی پاریس بکات، بەڵام بەهۆی داخرانی ئاسمانی عێراق بەهۆی جەنگەکەوە، گەشتەکە ئەنجام نەدرا و فڕۆکە تایبەتەکە تەرخان نەکرا.

ستراتیژیی ئێران بۆ کۆنتڕۆڵکردنی سێ گەرووی جیهانی

میدیای ئێران باس لەوە دەکات کە وڵاتەکەیان ستراتیژییەکی داڕشتووە بۆ هەژموون بەسەر سێ گەرووی گرنگدا: هورمز، بابولمەندەب و مالاکا. دەڵێن ئێستا دوو لەو گەرووانە بە تەواوی لەژێر کۆنترۆڵی "هێزەکانی بەرگری"دان.

تێکشکاندنی پێنج درۆنی "هێرمس"ی ئیسرائیلی لە ئێران

سوپای پاسداران رایگەیاند کە پێنج درۆنی پێشکەوتووی جۆری هێرمس (450 و 900)یان لە باشووری ئێران تێکشکاندووە. ئەم درۆنانە کە نرخی هەر دانەیەکیان ملیۆنان دۆلارە، بۆ سیخوڕی و هێرش بەکاردێن.

کۆکردنەوەی هاوکاری لە عێراق بۆ ئێران و لوبنان

لە ناوچەکانی ناوەڕاست و باشووری عێراق، هەڵمەتێکی فراوان بۆ کۆکردنەوەی هاوکاریی دارایی و پێداویستی بۆ ئێران و لوبنان دەستیپێکردووە. کاروانەکانی هاوکاری بە ئاڵای گروپە جیاوازەکانەوە بەرەو سنوورەکانی ئێران بەڕێکەوتوون.

ئێران: پێشنیازەکانی ئەمریکا نالۆژیکین

وەزارەتی دەرەوەی ئێران پێشنیازە 15 خاڵییەکەی ئەمریکای رەتکردەوە کە داوای هەڵوەشاندنەوەی بەرنامە ئەتۆمییەکە و موشەکییەکەی دەکرد لە بەرامبەر هەڵگرتنی سزاکان. ئێران دەڵێت هیچ گەرەنتییەک نییە و دەبێت خۆمان ئاسایشی خۆمان دابین بکەین.

فەتی یڵدز: دەبێت هەنگاوی خێرا بۆ پرۆسەی چارەسەری بنرێت

فەتی یڵدز، یاریدەدەری سەرۆکی پارتی بزووتنەوەی نەتەوەیی (مەهەپە) داوای کرد بەبێ لەدەستدانی کات، هەنگاوە یاسایی و کارگێڕییەکان بۆ پرۆسەی چارەسەری لە باکووری کوردستان و تورکیا جێبەجێ بکرێن. ئەم لێدوانە لە کاتێکدایە کە پێشتر دەوڵەت باخچەلی ئاماژەی بەوە کردبوو کە پێویست بە پەلە ناکات.

ئەحمەد شەرع لە ئەڵمانیا پێشوازییەکی گەرمی لێکرا

ئەحمەد شەرع، سەرۆکی سووریا گەیشتە بەرلینی پایتەختی ئەڵمانیا و لەلایەن رەوەندی سوورییەوە بە دروشمی "ئەڵڵاهو ئەکبەر" پێشوازی لێکرا. شەرع لەگەڵ بەرپرسانی باڵای ئەڵمانیا کۆدەبێتەوە بۆ تاوتوێکردنی پەیوەندییە دووقۆڵییەکان و پرۆسەی ئاوەدانکردنەوەی سووریا.

رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال)