مووچە، ئاڵۆزییەکانی ناوچەکە و شەڕی درۆنەکان؛ وردەکارییەکانی بەرنامەی رۆژی هیوا جەمال

لە بەرنامەی ئەمڕۆی رۆژی هیوا جەمال کە ئەمڕۆ سێشەممە، 31-3-2026 لە تۆڕی میدیایی رووداو پێشکێش کرا، چەندین پرسی گەرم و هەستیار تاوتوێ کران. لە سەرووی هەموویانەوە پرسی مووچەی فەرمانبەرانی هەرێمی کوردستان و بڕیاری خەرجکردنی لە هەفتەی داهاتوودا، هەروەها تیشک خرایە سەر ئاڵۆزییە سەربازییەکانی ناوچەکە، هێرشە بەردەوامەکانی سەر هەرێمی کوردستان و وڵاتانی کەنداو، لەگەڵ مەترسییەکانی داخستنی تەنگەی هورمز و لێکەوتە جیهانییەکانی جەنگی ئێران.

خالید شوانی: هەفتەی داهاتوو مووچەی مانگی سێ دێت

وەزیری دادی عێراق رایگەیاند کە محەممەد شیاع سوودانی و تەیف سامی دڵنیاییان داوە کە کێشە بۆ مووچەی مانگی ئاداری هەرێمی کوردستان دروست ناکەن، تەنانەت ئەگەر هەرێم نەتوانێت 120 ملیار دیناری داهاتی ناوخۆش رادەست بکات. بڕیارە هەفتەی داهاتوو وەزارەتی دارایی عێراق دەست بە خەرجکردنی مووچە بکات.

ئەنجوومەنی وەزیرانی عێراق چەندین بڕیاری گرنگ دەدات

لە کۆبوونەوەی ئەمڕۆی ئەنجوومەنی وەزیرانی عێراقدا، بڕیار لەسەر کڕینی چەک لە کۆریای باشوور و سیستمی بەرگری ئاسمانی لە بەریتانیا دەدرێت، هەروەها پڕۆژەی ئاوی کەرخ و رێکخستنەوەی قەرزەکانی کۆمپانیای "ئەلوەیس" لە بەرامبەر نەوتدا بۆ دابینکردنی سەبەتەی خۆراک پەسند کران.

کەورگۆسک؛ 9 کەس کوژران و بریندار بوون

بەهۆی کێشەیەکی کۆمەڵایەتیی نێوان خاڵ و خوارزایەک لە ناحیەی کەورگۆسکی سەر بە قەزای خەبات، شەڕە تەقە روویدا. پۆلیسی هەولێر رایگەیاندووە کە لە ئەنجامدا 6 کەس کوژراون و 3 کەسی دیکەش بریندار بوون و لێکۆڵینەوە لە رووداوەکە بەردەوامە.

لە ماوەی مانگێکدا 474 هێرش کراوەتە سەر هەرێمی کوردستان

بەپێی ئامارێکی پەیوەندییەکانی دەرەوەی پارتی، لە ماوەی 30 رۆژدا 474 هێرشی درۆنی و مووشەکی کراوەتە سەر هەرێمی کوردستان، سوپای پاسداران 179 هێرش و میلیشیاکانی ناو عێراق 295 هێرشیان ئەنجامداوە، پارێزگای هەولێر بە 370 هێرش زۆرترین پشکی بەرکەوتووە.

دابەشکردنی گازی ماڵان لە هەولێر و هەڵەبجە

ئەمڕۆ لە هەولێر 30 هەزار بوتڵ و لە هەڵەبجە 1000 بوتڵ گازی ماڵان بە نرخی حکومی (8500 دینار) دابەش دەکرێت، لایەنە پەیوەندیدارەکان جەخت دەکەنەوە کە پێویستە هاووڵاتیان کارتی نیشتمانی و فۆرمی خۆراکیان پێبێت.

ئۆفەری ئینتەرنێت بۆ خوێندنی ئۆنلاین و ناڕەزایەتی قوتابیان

وەزارەتی خوێندنی باڵا داوای لە کۆمپانیاکانی ئینتەرنێت کردووە ئۆفەری هەرزان بۆ قوتابیان دابین بکەن، هاوکات نوێنەرانی قوتابیانی زانکۆی سلێمانی دژی سیستمی ئۆنلاینن و دەڵێن کوالێتی خوێندن دادەبەزێنێت و کێشەی تەکنیکی زۆرە.

سەرکۆنەکردنی هێرشەکەی سەر ماڵی نێچیرڤان بارزانی

نەتەوەیەکگرتووەکان و ئۆزگور ئۆزەل، سەرۆکی جەهەپەی تورکیا، بە تووندی سەرکۆنەی ئەو هێرشەیان کرد کە کرایە سەر ماڵی نێچیرڤان بارزانی لە دهۆک، نەتەوەیەکگرتووەکان داوای لێکۆڵینەوەی دەستبەجێ دەکات و جەهەپەش هێرشەکە بە هەوڵێک بۆ تێکدانی سەقامگیری ناوچەکە دەزانێت.

حەشدی شەعبی لە بابل و ئەنبار بۆردوومانکران

فڕۆکە جەنگییەکانی ئەمریکا و ئیسرائیل، هێرشیان کردە سەر بارەگاکانی لیوای 27، 31 و 45ی حەشدی شەعبی لە ناوچەکانی جورف سەخر و گەرمە.

هێرش کرایە سەر کەشتییەکی کوێتی و ناوچەکانی ئیمارات

کەشتییەکی نەوتهەڵگری کوێتی لە بەندەری دووبەی رووبەڕووی هێرش بووەوە و ئاگری گرت. هاوکات بەرگری ئاسمانی ئیمارات چەندین درۆن و مووشەکی تێکشکاندووە. ئامارەکان باس لەوە دەکەن لە مانگێکدا ئێران نزیکەی 6 هەزار هێرشی کردووەتە سەر وڵاتانی کەنداو.

تەکتیکی نوێی بەرپرسانی ئێران؛ کۆبوونەوە لە مەلەوانگە و ژێرزەمین

بەرپرسانی باڵای ئێران بۆ پاراستنی گیانیان و چەواشەکردنی هەواڵگریی دوژمن، کۆبوونەوەکانیان دەبەنە ژێرزەمین و مەلەوانگەکان، هەندێک دیمەن نیشانی دەدەن کە فەرماندە سەربازییەکان لە ژووری کارتۆنیدا چاوپێکەوتن دەکەن بۆ ئەوەی شوێنەکەیان ئاشکرا نەبێت.

گومان لە ئامارەکانی مانگی سووری ئێرانی دەکرێت

بەپێی بەدواداچوونەکان، کێشەی ماتماتیکی لە ئامارەکانی زیانی جەنگ لە ئێراندا هەیە، بۆ نموونە ژمارەی قوتابخانە زیانلێکەوتووەکان لەسەر 600 وەستاوە و کۆی گشتی یەکە زیانلێکەوتووەکانی تاران و پارێزگاکان لەگەڵ ژمارە راگەیەندراوە گشتییەکە یەکناگرێتەوە.

قەیرانی وزە و یاسا نوێیەکان

داخستنی تەنگەی هورمز و بووژانەوەی نۆکەندی پەنەما

پەرلەمانی ئێران پڕۆژەیاسایەکی پەسند کرد بۆ قەدەخەکردنی کەشتییەکانی ئەمریکا و ئیسرائیل لە تەنگەی هورمز، ئەم ئاڵۆزییانە وایکردووە نۆکەندی پەنەما ریکۆردی مێژوویی لە هاتووچۆی کەشتییەکان تۆمار بکات و ببێتە جێگرەوەیەک بۆ بازرگانی جیهانی.

15 هەنگاو بۆ رووبەڕووبوونەوەی قەیرانی وزە

پسپۆڕان چەندین رێکاریان بۆ وڵاتان دیاری کردووە بۆ رووبەڕووبوونەوەی قەیرانی وزە، لەوانە: بەکارهێنانی یەدەگی ستراتیژی، کەمکردنەوەی باج و گەڕانەوە بۆ وزەی ئەتۆمی و خەڵووز بۆ کەمکردنەوەی تێچووەکانی جەنگ.

دۆخی قودس و ئیسرائیل

داخرانی مزگەوتی ئەقسا و ناڕەزایەتی وڵاتانی عەرەبی

بۆ ماوەی مانگێکە ئیسرائیل رێگەی نەداوە موسڵمانان بچنە مزگەوتی ئەقسا. وەزیرانی دەرەوەی 8 وڵاتی ئیسلامی و عەرەبی لە راگەیەندراوێکی هاوبەشدا ئەم رێگرییەیان سەرکۆنە کرد و بە هەڕەشە بۆ سەر ئاشتی ناوچەکە وەسفیان کرد.

ئیسرائیل یاسای لەسێدارەدانی پەسند کرد

پەرلەمانی ئیسرائیل (کنێسێت) بە زۆرینەی دەنگ یاسای لەسێدارەدانی بۆ ئەو کەسانە پەسند کرد کە بە "تیرۆر" تۆمەتبار دەکرێن. ئەم بڕیارە رەخنەی توندی وڵاتانی ئەورووپای لێکەوتەوە و بە پێشێلکاری مافەکانی مرۆڤ دادەنرێت.


رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).