چاوی جیهان لەسەر نیویۆرک و هی فەرمانبەرانی هەرێمی کوردستان لەسەر بەغدایە

لە کاتێکدا چاوی سەرکردەکانی جیهان لەسەر نیویۆرکە، چاوی فەرمانبەرانی هەرێم لەسەر بەغدایە. ئەمڕۆ رۆژی ناکۆکییەکانە: زەنگی قوتابخانە بەرامبەر بایکۆت، هیوا بۆ مووچە بەرامبەر نائومێدیی دواکەوتن. لەگەڵمان بن بۆ شیکردنەوەی ئەم دۆخە ئاڵۆزە و گرنگترین رووداوەکانی دیکەی جیهان لە رۆژی هیوا جەمال.

چارەنووسی مووچە و زەنگی خوێندنگەکان


هاوکات لەگەڵ ئەم چاوەڕوانییەدا، سبەی نزیکەی دوو ملیۆن قوتابی و مامۆستا و فەرمانبەر روو لە خوێندنگەکان دەکەن. 

وەزارەتی پەروەردە ئامادەکارییەکانی تەواو کردووە؛ 434 قوتابخانە نۆژەن کراونەتەوە و نزیکەی 800 پۆلی نوێ ئامادەن. بەڵام لەبەرامبەردا، ئەنجومەنی مامۆستایانی ناڕازی بانگەوازی بایکۆت دەکات و دەوامکردن بەبێ مووچە بە "کۆیلایەتیی سەردەم" ناودەبات، کە ئەمەش دۆخێکی ئاڵۆزی لەبەردەم ساڵی نوێی خوێندندا دروست کردووە.

گۆڕانکاری لە سیاسەت و ژینگەدا

لە گۆڕەپانی سیاسیدا، بزووتنەوەی گۆڕان دابەشبوونێکی دیکە بەخۆیەوە دەبینێت.  ئەمڕۆ باڵی "کوردسات" دیدارێکی جەماوەری بە بەشداریی 1200 کەس ساز دەکات بە ئامانجی خۆڕێکخستنەوە، لە کاتێکدا باڵی "گردی زەرگەتە" بە توندی دیدارەکە ڕەتدەکاتەوە و بە پێشێلکاریی دەستووری ناوی دەبات.

لە عێراقەوە بۆ جیهان

سەرەڕای ئەم دۆخە سەختە، حکومەتی عێراق هەنگاوێک بەرەو دیجیتاڵبوون دەنێت. محەمەد شیاع سودانی رەزامەندیی لەسەر پڕۆژەی "واژۆی ئەلیکترۆنی" داوە، کە ئامانج لێی کەمکردنەوەی رۆتین و گەندەڵییە لە دامودەزگاکانی دەوڵەت و کەرتی تایبەتدا.
لە بەغداوە دەچینە نیویۆرک، شوێنی کۆبوونەوەی گشتیی نەتەوە یەکگرتووەکان. ئەمڕۆ، کۆمەڵەی گشتی بە 145 دەنگی "بەڵێ" پڕۆژەبڕیاری بەشداریکردنی فەڵەستینی لە خولی 80ی دا پەسەند کرد. هاوکات، سەرۆکی فەرەنسا بەڵێنی داوە هەوڵ بۆ دانپێدانان بە دەوڵەتی سەربەخۆی فەڵەستین بدات. ئەمە لە کاتێکدایە کە ژمارەی قوربانییەکان لە غەززە 65 هەزار کەسی تێپەڕاندووە.

جەنگی وێنەکان و بڕیارە نوێیەکان

لەگەڵ جەنگی سەر زەوی، جەنگی وێنەکانیش بەردەوامە. ڤیدیۆیەک کە گوایە تەرمی دەیان فەلەستینی نیشان دەدات، بە فراوانی بڵاوبووەوە. بەڵام فاکت-چێکی "رۆژی هیوا جەمال" دەریخست کە ڤیدیۆکە ساختەیە و بە تەکنیکی ژیریی دەستکرد دروستکراوە، کە نیشانەی روونی وەک جوڵەی سەیر و دیارنەمانی کەسەکانی تێدایە.

لە کۆتاییشدا، لە ئەمریکا، دۆناڵد ترەمپ بڕیارێکی واژۆ کردووە بۆ فرۆشتنی ڤیزای "کارتی ئاڵتوونی" بە یەک ملیۆن دۆلار، بە وتەی خۆی بۆ ئەوەی "خەڵکە باشەکان" بێنە ناو ئەمریکاوە، نەک ئەوانەی لەسەر حکومەت دەژین.

رۆژی هیوا جەمال

شۆیەکی 40 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).