پارەی داهاتی نانەوتی دەگاتە بەغدا و شەڕ لە پەرلەمانی تورکیا روویدا

ئەمڕۆ دووشەممە، جووڵەیەکی دارایی چڕ لە نێوان هەولێر و بەغدا بەدی دەکرێت بۆ چارەسەرکردنی پرسی مووچە، هاوکات لە چەمچەماڵ قۆناخی یەکەمی قەرەبووکردنەوەی زیانلێکەوتووانی لافاو دەستیپێکرد. لەسەر ئاستی ناوچەکەش گرژییەکانی ئیسرائیل و ئێران و هەوڵە سیاسییەکانی باکووری کوردستان مژاری گەرمی رۆژن.

کە خەوتبوویت چی روویدا؟

لە درەنگانی شەوی رابردووەوە تاوەکو بەرەبەیانی ئەمڕۆ، چەندین رووداوی گرنگ لە ناوخۆ و دەرەوە تۆمار کران:
•خۆپیشاندان لە کەرکووک: درەنگانی شەوی رابردوو، دانیشتووانی گەڕەکی کوردستانی شاری کەرکووک بەهۆی بێبەشبوونیان لە کارەبا بۆ ماوەی هەفتەیەک، ڕژانە سەر شەقامەکان و ئاماژەیان بەوە دا کە "بەهۆی ناوی گەڕەکەکەیانەوە سزای سیاسی دەدرێن".
•ئاگرکەوتنەوە لە هەولێر: کاژێر 11:30ی شەو، ئاگر لە کۆگایەکی گەورەی مۆبیلیات لەسەر رێگەی گەزنە کەوتەوە. تیمەکانی بەرگریی شارستانی دوای 45 خولەک توانییان کۆنترۆڵی بکەن، بەڵام زیانی ماددی زۆری لێکەوتەوە.
•شەوی یەڵدا دەوامی ئێرانی پەکخست: بەهۆی ئاهەنگەکانی شەوی یەڵداوە، ئەمڕۆ دەوامی فەرمیی دامودەزگاکانی ئێران (جگە لە خزمەتگوزارییەکان) دوو کاژێر دواخرا. شەوی رابردوو قەرەباڵخییەکی زۆر لە شەقامەکانی تاران و شارەکانی رۆژهەڵاتی کوردستان بەدی دەکرا.
•دیداری نهێنیی ئەمریکا و رووسیا: ستێڤ ویتکۆڤ، نێردەی ترەمپ ئاشکرای کرد کە بەرەبەیانی ئەمڕۆ لەگەڵ نێردەی تایبەتی رووسیا لە فلۆریدا کۆبوونەوەی "بەرهەمدار"یان ئەنجامداوە بۆ تاوتوێکردنی ئاشتی لە


120 ملیارەکە رەوانەی بەغدا کرا؛ سبەی چارەنووسی مووچەی سێ مانگ یەکلایی دەکرێتەوە

ئەمڕۆ وەزارەتی دارایی هەرێمی کوردستان بڕی 120 ملیار دینار داهاتی نانەوتیی مانگی تشرینی یەکەمی رەوانەی هەژماری بانکیی وەزارەتی دارایی عێراق دەکات لە لقی هەولێری بانکی ناوەندی. لەو بڕە، 48 ملیار دیناری داهاتی پارێزگاکانی سلێمانی و هەڵەبجەیە.
ئەم هەنگاوە دوای ئەوە دێت کە تەیف سامی، وەزیری دارایی عێراق مەرجی ناردنی مووچەی بە جێبەجێکردنی چەند خاڵێکەوە بەستبووەوە. بڕیارە سبەی سێشەممە ئەنجوومەنی وەزیرانی عێراق کۆببێتەوە و بڕیار لە خەرجکردنی مووچەی مانگی 10 بدات و چارەنووسی مووچەی مانگەکانی 11 و 12ش یەکلایی بکاتەوە.

د. فاتیح سەنگاوی: دابەشکردنی پارەی "خێرخوازان" بەسەر زیانلێکەوتووانی چەمچەماڵ دەستیپێکرد

ئەمڕۆ قۆناخی یەکەمی دابەشکردنی پارەی قەرەبووی لافاوەکەی چەمچەماڵ دەستیپێکرد. د. فاتیح سەنگاوی، ئەندامی بۆردی چاودێریی پڕۆسەکە لە بەرنامەی (رۆژی هیوا جەمال)ی تۆڕی میدیایی رووداو رایگەیاند: "ئەو پارەیە هی خێرخوازان و سەرمایەدارانە و پەیوەندی بە بودجەی حکومەتەوە نییە."
بەپێی پلانی لیژنەکە، ئەمڕۆ لە سەنتەری چەمچەماڵ 639 خێزان چەکی بانک وەردەگرن، بڕی پارەکەش بەپێی زیانەکان لە 200 هەزارەوە بۆ 20 ملیۆن دینار دەبێت. قۆناخەکانی دواتر ناحیەکانی شۆڕش، تەکیە، ئاغجەلەر و دوکان و زیانی ئۆتۆمبێلەکان دەگرێتەوە.

زێڕ ژمارەیەکی پێوانەیی تۆمار کرد؛ ئۆنسەیەک گەیشتە 4411 دۆلار

نرخی زێڕ ئەمڕۆ ئاستێکی پێوانەیی نوێی تۆمارکرد و گەیشتە 4411 دۆلار بۆ هەر ئۆنسەیەک. هۆکارەکان بۆ دابەزینی بەهای دۆلار و پێشبینی کەمکردنەوەی سوودی بانکی دەگەڕێتەوە. زێڕ لەمساڵدا 67% بەرزبووەتەوە.

نوێنەرەکەی ترەمپ بۆ عێراق: دەبێت چەک تەنیا لە دەستی دەوڵەتدا بێت

مارک ساڤایا، نوێنەری ترەمپ بۆ عێراق پێشوازی لە هەر هەنگاوێک کرد بۆ کۆنترۆڵکردنی چەک لەلایەن دەوڵەتەوە و ستایشی هەڵوێستی مەرجەعییەتی شیعەی کرد. ساڤایا هۆشداریدا کە عێراق دەبێت لە نێوان سەروەریی یاسا یان مانەوە لەژێر ڕەحمەتی گرووپە چەکدارەکاندا یەکێکیان هەڵبژێرێت.

سوننەکان لەسەر پۆستی سەرۆکی پەرلەمان رێکنەکەوتن

کۆبوونەوەی شەوی رابردووی ئەنجوومەنی سیاسیی سوننەکان بۆ یەکلاکردنەوەی پۆستی سەرۆکی پەرلەمانی عێراق بێ ئەنجام بوو. ململانێکە لەسەر دابەشکردنی پۆستە سیادییەکانە لە نێوان هاوپەیمانی تەقەدووم و عەزم. بڕیارە سبەی کۆبوونەوەیەکی یەکلاکەرەوە ئەنجام بدەن.

ململانێی حیزبی گۆڕانکاریی ئیداریی لە نەینەوا پەکخستووە

سەرەڕای بڕیاری بەغدا بۆ گۆڕینی ئەو بەڕێوەبەرانەی 4 ساڵیان تێپەڕاندووە، بەڵام ناکۆکیی نێوان پارتی، یەکێتی و کوتلەکانی دیکە وایکردووە چارەنووسی 20 یەکەی کارگێڕی لە نەینەوا بە هەڵواسراوی بمێنێتەوە.

بەغدا وەڵامی کۆمپانیای DNO دەداتەوە: دەبێت نەوت رادەستی سۆمۆ بکەن

وەزارەتی نەوتی عێراق رایگەیاند کە کۆمپانیاکانی نەوت لە هەرێم دەبێت نەوتەکەیان رادەستی کۆمپانیای سۆمۆ بکەن. ئەمەش وەک وەڵامێک بۆ کۆمپانیای DNOی نەرویجی هات کە رایگەیاندبوو بەردەوام دەبێت لە فرۆشتنی سەربەخۆ بۆ وەرگرتنەوەی قەرزەکانی.

راپەڕین؛ بێکاری گەیشتووەتە 33% و کۆچکردن رووی لە زیادبوونە

توێژینەوەیەکی دامەزراوەی ڤیژن دەریخستووە کە رێژەی بێکاری لە ئیدارەی راپەڕین گەیشتووەتە 33.3% و نزیکەی نیوەی خێزانەکان ئەندامێکیان کۆچی کردووە. هۆکارەکان بۆ قەیرانی دارایی و نادادی لە دابەشکردنی هەلی کار دەگەڕێندرێنەوە.

مین لە پشدەر مێگەلێک مەڕ و لە مێرگەپان شوانێکی کردە ئامانج

لە ناحیەی سەنگەسەر مینێک بە مێگەلێکدا تەقییەوە و 15 سەر ئاژەڵی کوشت، لە گوندی مێرگەپانیش بەهۆی لافاوەوە مینێک هاتووەتە خوارەوە و شوانێکی بریندار کردووە. هێشتا 200 کیلۆمەتر دووجا مینڕێژکراو لە هەرێم ماوە.

بە شەڕە مست و دەنگدان بودجەی 2026ـی تورکیا پەسند کرا

پەرلەمانی تورکیا دوای شەڕە مستی نێوان پەرلەمانتارانی ئاکپارتی و جەهەپە، بودجەی ساڵی 2026ی بە زۆرینەی دەنگ پەسند کرد. بودجەکە بە 320 دەنگی بەڵێ بەرامبەر 249 دەنگی نەخێر تێپەڕی.

شاندی ئیمراڵیی دەم پارتی لەگەڵ سەرۆکی جەهەپە کۆدەبێتەوە

لە چوارچێوەی هەوڵەکان بۆ پرۆسەی ئاشتی، ئەمڕۆ شاندی ئیمراڵیی دەم پارتی لەگەڵ ئۆزگور ئۆزەل، سەرۆکی جەهەپە کۆدەبێتەوە. بەرپرسانی دەم پارتی جەخت دەکەنەوە کە پەرلەمان شوێنی چارەسەرە و ئۆجەلان ئەکتەری سەرەکییە.

سووکایەتیکردن بە لەیلا زانا هەڵمەتی بایکۆتی "ئۆڵۆداغ"ی لێکەوتەوە

دوای ئەوەی هاندەرانی یانەی بورسەسپۆر سووکایەتییان بە لەیلا زانا کرد، هاندەرانی ئامەدسپۆر کەمپینی بایکۆتی خواردنەوەی گازیی "ئوڵوداغ"یان راگەیاند. وەزارەتەکانی داد و وەرزشی تورکیا هاتنە سەر هێڵ و لێکۆڵینەوەیان دەستپێکردووە.

ئۆجەلان: دەمانەوێت کۆتایی بە شیوەنی دایکانی شەهیدان بهێنین

عەبدوڵڵا ئۆجەلان لە پەیامێکدا رایگەیاند کاتی ئەوە هاتووە لە رێگەی سیاسەتەوە مافەکان بەدەستبهێنرێن و "رێگری لە ناشتنی گەنجان و شیوەنی دایکان" بکرێت. پەیامەکە وەک گۆڕانکاری لە ستراتیژی پەکەکە بۆ قۆناخێکی مەدەنی لێکدەدرێتەوە.

ئیسرائیل هۆشداری دەداتە ترەمپ: ئێران ئامادەکاری بۆ هێرش دەکات

راپۆرتە هەواڵگرییەکان باس لەوە دەکەن کە ئیسرائیل هۆشداری داوەتە ئەمریکا کە ئێران بە نهێنی مووشەکی بالیستی بەرهەم دەهێنێت و رەنگە خۆی دەستپێشخەری هێرش بکات. بڕیارە ئەمڕۆ نەتانیاهۆ و ترەمپ کۆببنەوە بۆ تاوتوێکردنی بژاردە سەربازییەکان.

زانایان "منداڵدانی ئاوی" بۆ رزگارکردنی کۆرپە پێشوەختەکان دادەهێنن

زانایانی هۆڵەندا و ئەڵمانیا تەکنەلۆژیای "منداڵدانی ئاوی"یان پەرەپێداوە کە ژینگەی ناو سکی دایک بۆ ئەو کۆرپانە دروست دەکاتەوە کە زۆر زوو لەدایک دەبن، ئەمەش بۆ رێگریکردنە لە تێکچوونی سییەکانیان و پێدانی کاتی زیاتر بۆ گەشەکردن.

ئەمڕۆ چی روودەدات؟

•دابەشکردنی پارە لە چەمچەماڵ:  قۆناخی یەکەمی دابەشکردنی پارەی قەرەبووی لافاوەکەی چەمچەماڵ دەستیپێکرد، کە تێیدا 639 خێزان سوودمەند دەبن.
•سەردانی شاندی ئیمراڵی: کاژێر 12:00ی نیوەڕۆ، شاندی ئیمراڵیی دەم پارتی لەگەڵ ئۆزگور ئۆزەل، سەرۆکی جەهەپە کۆدەبێتەوە و دواتریش سەردانی پارتی رەنجدەران دەکەن.
•بڕیارێکی سەربازیی ترەمپ: بڕیارە ئەمڕۆ دۆناڵد ترەمپ لە فلۆریدا، بە ئامادەبوونی وەزیرانی بەرگری و هێزی دەریایی، راگەیێندراوێکی گرنگ لەبارەی بەهێزکردنی توانای سەربازیی ئەمریکا بڵاوبکاتەوە.
•گوتاری پاپا: پاپا فرانسیس گوتاری ساڵانەی خۆی بەبۆنەی جەژنەکانی کریسمس بۆ کاردیناڵ و بەرپرسانی ڤاتیکان پێشکێش دەکات.
•کۆبوونەوەی ئەنجوومەنی ئاسایش: ئەنجوومەنی ئاسایشی نێودەوڵەتی کۆبوونەوەیەکی تایبەت لەبارەی دۆخی ئاڵۆزی سوودان و سوودانی باشوور ئەنجام دەدات.

رۆژی هیوا جەمال

شۆیەکی 40 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).