ئاڵۆزییەکانی ناوچەکە و کاریگەری بەسەر دۆخی هەرێمی کوردستان

هەرێمی کوردستان لەبەردەم کۆمەڵێک پێشهاتی خێرا و جیاوازدایە؛ لە لایەکەوە شەپۆلێکی بەهێزی سەرما و باران روو لە ناوچەکە دەکات، لە لایەکی دیکەوە ئاسمانی هەولێر دەبێتە گۆڕەپانی تێکشکاندنی مووشەک و درۆنەکان، هاوکات لەگەڵ بەردەوامیی کاردانەوەکان بۆ شەهیدبوونی شەش پێشمەرگە، جووڵە دیپلۆماسییەکان بۆ هێورکردنەوەی گرژییەکانی نێوان واشنتن و تاران چڕتر دەبنەوە.

شەپۆلێکی بەهێزی باران و بەفر هەرێمی کوردستان دەگرێتەوە

لە ئەمڕۆوە هەرێمی کوردستان دەکەوێتە ژێر کاریگەریی نزمەپەستانی دەریای ناوەڕاست و بارستە هەوایەکی سارد، پێشبینی دەکرێت بارانی لێزمە و تەزرە ببارێت و ئاستی ئاو بەرز ببێتەوە. لە ناوچە شاخاوییەکان بەفر دەبارێت و پلەکانی گەرما چوار تا شەش پلە دادەبەزن، هۆشداری دەدرێتە هاونیشتمانیان کە لە رووبار و ناوچە شاخاوییەکان دوور بکەونەوە.

تێکشکاندنی مووشەک و درۆنەکان لە ئاسمانی هەولێر

لە شەوی رابردووەوە فڕۆکە جەنگییەکانی هاوپەیمانان بە چڕی لە ئاسمانی هەولێر سووڕانەوە و توانییان چوار مووشەک و پێنج درۆن کە لە لایەن ئێران و سنوورەکانی باکوورەوە ئاراستە کرابوون، تێکبشکێنن. پارێزگاری هەولێر دڵنیایی دایە هاونیشتمانیان کە فڕۆکەکان بۆ پاراستنی شارەکەن، پاشماوەی مووشەکەکان لە باشووری سۆران و ناو فڕۆکەخانەی هەولێر کەوتوونەتە خوارەوە و درۆنێکیش لە گوندی لوبنانی کەوتووەتە خوارەوە و زیانی ماددی لێکەوتووەتەوە.

مژدەی وەزیری دارایی عێراق لەبارەی مووچە

محەمەد شیاع سوودانی رایگەیاندووە کە کێشەی پارەیان نابێت، تەیف سامی، وەزیری دارایی عێراق ئاشکرای کردووە کە لانی کەم بۆ پێنج تا شەش مانگی داهاتوو کێشەی مووچە نابێت، لە ئەمڕۆوە رێکارەکانی پارەدارکردنی مووچەی مانگی ئاداری فەرمانبەرانی عێراق دەستیپێکردووە و وەزارەتی دارایی هەموو ئامادەکارییەکی کردووە.

سوودانی ئیدانەی شەهیدبوونی پێشمەرگەکانی کرد

لە کۆبوونەوەی ئەنجوومەنی وەزیراندا، محەمەد شیاع سوودانی ئیدانەی شەهیدبوونی شەش پێشمەرگەی لە ناوچەی سپیلک کرد، بەڵام ناوی پێشمەرگەی بە شەڕکەر هێناوە و ناوی ئێرانیشی وەک ئەنجامدەر نەهێنا،  سوودانی هێرشی کردە سەر ئەمریکا و ئیسرائیل و رایگەیاند کە ئەوان ستەمیان لە ئێران کردووە. 

دوایین زانیاری لەسەر تەندروستیی پێشمەرگە بریندارەکان

سەرپەرشتیاری ئیدارەی سەربەخۆی سۆران رایگەیاند، لە کۆی 30 پێشمەرگەی بریندار، 28ـیان گەڕاونەتەوە ماڵەوە و تەنیا دوو پێشمەرگە لە نەخۆشخانە ماونەتەوە کە تەندروستییان جێگیرە، هێرشەکەی ئێران بۆ سەر سۆران بووە هۆی شەهیدبوونی شەش پێشمەرگە کە زۆربەیان گەنج بوون

د. عەلی قەرەداغی سەرەخۆشی لە سەرکردایەتیی کورد دەکات

ئەمینداری گشتیی یەکێتیی جیهانیی زانایانی موسڵمان، پەیامێکی سەرەخۆشی ئاراستەی سەرۆک بارزانی و سەرۆکایەتیی هەرێم و حکومەت و لایەنە سیاسییەکان کرد. د. عەلی قەرەداغی خەمباریی خۆی بۆ شەهیدبوونی پێشمەرگەکان دەربڕی.

ئەمریکا سەرکۆنەی هێرشەکانی سەر هەولێر دەکات

وەزارەتی دەرەوەی ئەمریکا لە رێگەی رووداوەوە هێرشەکانی ئێران و میلیشیاکانی بۆ سەر هەولێر بە "قێزەون" ناوبرد. تۆمی پیگۆت، جێگری گوتەبێژی وەزارەتەکە، سەرەخۆشی لە بنەماڵەی پێشمەرگە شەهیدەکان کرد و جەختی لە پشتگیریی ئەمریکا کردەوە.

ئێران بەرپرسیارێتی هێرشەکەی سەر هەولێری گرتە ئەستۆ

ئەرتەشی ئێران رایگەیاند کە بە مووشەکی "زەوی بۆ زەوی" ناوەندێکی پشتیوانیی هێزەکانی ئەمریکایان لە فڕۆکەخانەی هەولێر کردووەتە ئامانج. ئێران رایگەیاندووە کە ئەو شوێنە بارەگای گرووپە ئۆپۆزیسیۆنەکانی ئێرانی تێدایە، بەڵام سەرچاوە ئەمنییەکان دەڵێن هەموو مووشەکەکان تێکشکێنراون.

سۆمۆ: هەناردەی نەوتی هەرێمی کوردستان زیاد دەکات

بەڕێوەبەری کۆمپانیای سۆمۆ رایگەیاند کە پلان هەیە هەناردەی نەوتی هەرێمی کوردستان لە 23 هەزار بەرمیلەوە بۆ 50 هەزار بەرمیل زیاد بکرێت، هەروەها ئاماژەی بەوە کرد کە ئێستا 250 هەزار بەرمیل نەوتی کەرکووک لە رێگەی بۆریی نەوتی کوردستانەوە هەناردە دەکرێت.

هۆشداری لە قەیرانی سووتەمەنی لە ئەورووپا

بەڕێوەبەری کۆمپانیای (شێڵ) هۆشداری دەدات کە لە مانگی نیسانەوە ئەورووپا تووشی کەمیی گازوایل و بەنزین دەبێت. ئەمەش بەهۆی لێکەوتەکانی جەنگی رۆژهەڵاتی ناوەڕاست و داخستنی گەرووی هورمزەوە هەیە کە کاریگەرییان کردووەتە سەر ئاسایشی وزەی جیهان.

مەرجەکانی ئێران بۆ تێپەڕبوونی کەشتییەکان لە تەنگەی هورمز

وەزارەتی دەرەوەی ئێران چوار مەرجی بۆ تێپەڕبوونی کەشتییەکان لە تەنگەی هورمز دیاری کردووە، لەوانە پشتگیری نەکردنی "دوژمنانی ئێران" و هاوئاهەنگی تەواو. ئێران دەڵێت ڕێگە بە کەشتییەکانی ئەمریکا و ئیسرائیل نادات تێپەڕ بن، ئەمەش لە کاتێکدایە ترەمپ داوای ناردنی هێزی دەریایی بۆ پاراستنی گەرووەکە دەکات.

گومانی فێڵ و گەندەڵی لە بازاڕی نەوتی جیهانیدا

تەنیا 15 خولەک بەرلە بڕیارەکەی ترەمپ بۆ راگرتنی هێرشەکان، جووڵەیەکی نائاسایی لە بازاڕی نەوت بینراوە و بە بەهای 650 ملیۆن دۆلار گرێبەست کراوە، ئەمەش گومانی "دزەپێکردنی زانیاری" و گەندەڵی دروست کردووە، چونکە بازرگانان قازانجێکی خەیاڵییان کردووە.

ماکرۆن پەیوەندی بە پزیشکیانەوە دەکات

سەرۆکی فەرەنسا داوای لە سەرۆککۆماری ئێران کرد هێرشەکان بۆ سەر وڵاتانی ناوچەکە رابگرێت و ئازادیی کەشتیوانی بۆ تەنگەی هورمز بگێڕێتەوە، ماکرۆن هەروەها داوای ئازادکردنی دوو هاووڵاتیی فەرەنسی کرد کە لە ئێران دەستگیرکراون.

پلانی ١٥ خاڵیی ترەمپ بۆ کۆتاییهێنان بە جەنگی ئێران

ئەمریکا لە رێگەی پاکستانەوە پلانێکی بۆ ئاگربەستی یەک مانگی و 15 مەرج ناردووە بۆ تاران، کە تێیدا داوای راگرتنی پیتاندنی یۆرانیۆم دەکات، ترەمپ دەڵێت ئێران "دیارییەکی گەورەی" پێشکەش کردووە و ئامادەی دانوستانن، بەڵام هاوکات سێ هەزار سەربازی دیکە رەوانەی ناوچەکە دەکات.

گۆڕانکاریی گەورە لە ئەنجوومەنی ئاسایشی نیشتمانیی ئێران

محەمەد باقر زولقەدر وەک سکرتێری نوێی ئەنجوومەنی ئاسایشی نیشتمانیی ئێران دەستنیشانکرا، شارەزایان دەڵێن ئەمە نیشانەی کۆنترۆڵکردنی تەواوەتی جومگەکانی دەسەڵاتە لە لایەن سوپای پاسدارانەوە و گرتنەبەری سیاسەتێکی توندڕەوانەترە دژی ئیسرائیل و ئەمریکا.

ئێران داوای هاوپەیمانییەکی سەربازیی ئیسلامی دەکات

گوتەبێژی خاتەمولئەنبیا داوای لە وڵاتانی عەرەبی کرد هاوپەیمانییەکی سەربازی بێ ئەمریکا پێکبهێنن. ئەو دەڵێت ئەمریکا تەنیا بۆ نەوت لێرەیە و وەک "مانگای شیردەر" سەیری وڵاتانی ناوچەکە دەکات و لە کاتی پێویستدا بەرگرییان لێ ناکات.

کۆبوونەوەی چوارچێوەی هاوئاهەنگی و نائامادەیی سەرکردەکان

لە کۆبوونەوەی شەوی رابردووی شیعەکاندا، نووری مالیکی، قەیس غەزعەلی و ئەبو ئالای وەلائی بەشدارییان نەکرد. چوارچێوەی هاوئاهەنگی باسی هێرشی سەر پێشمەرگەی نەکرد، بەڵام هێرش بۆ سەر حەشدی شەعبی بە پێشێلکردنی سەروەری ناوبرد.

عێراق مافی وەڵامدانەوەی سەربازی بە هێزە ئەمنییەکان دەدات

حکومەتی عێراق بڕیاریدا باڵیۆزی ئێران و نوێنەری ئەمریکا بانگهێشت بکات. هەروەها دەسەڵاتی وەڵامدانەوەی سەربازیی دراوەتە هێزە چەکدارەکان و پێشمەرگە بۆ هەر دەستدرێژییەک کە بکرێتە سەر بارەگا فەرمییەکان.

پێشانگەی نێودەوڵەتیی کتێب لە هەولێر دوادەخرێت

بەهۆی دۆخی ئەمنی و نائارامیی ناوچەکە، کارگێڕی پێشانگەی نێودەوڵەتیی کتێبی هەولێر بڕیاریدا خولی ئەمساڵ بۆ کاتێکی نادیار دوابخات، ئەمەش لە پێناو پاراستنی سەلامەتیی بەشداربووان و میوانەکان.

ئاگادارییەک بۆ خاوەنکاران لە سنووری هەولێر

بەڕێوەبەرایەتیی دەستەبەری کۆمەڵایەتی هەولێر داوا لە خاوەنکاران دەکات لە رێگەی سیستەمی ئەلیکترۆنییەوە زانیارییەکانیان نوێ بکەنەوە. ئەم هەنگاوە بۆ خێراکردنی مامەڵە داراییەکانی مانگی شوباتە و پێویستە پێش کۆتایی مانگی ئادار ئەنجام بدرێت.


رۆژی هیوا جەمال

شۆیەکی 50 خولەکییە هەموو بەیانییەک کاژێر 08:00 بەشێوەی زیندوو پێشکێش دەکرێت. تێیدا گفتوگۆی پڕ زانیاری لەگەڵ کەسانێک دەکرێ کە مەرج نییە لەنێو هەواڵەکاندا ناسراوبن، بەڵام مژارەکانیان زۆر گرنگن. هەوڵدەدرێ لە رێگەی چیرۆکە کەسییەکانەوە باشتر و ئاسانتر زانیاری بگەیێندرێتە خەڵک.

لە ماوەی بەرنامەکەدا هەوڵدەدرێ وەرگر بەشی تەواوی رۆژەکە بەرچاوڕوونیی هەبێ سەبارەت بەو شتانەی لە کوردستان و ناوچەکە و جیهانیش روودەدەن. هەموو بەیانییەکیش هیوا جەمال راستی و ناڕاستیی زانیارییەک ئاشکرا دەکات کە لەنێو خەڵک دا بڵاوبوونەتەوە. 

دیوێکی جیاوازی دیکەی ئەم شۆیە، گەنگەشەی پێشکێشکارە لەنێو خەڵک و لەسەر شەقام لەسەر ئەو مژارانەی رای گشتییان بەخۆیەوە سەرقاڵ کردووە. 

ئامانجی شۆیەکە ئەوەیە وەرگری کوردستانی لە هەواڵی ساختە (فەیک نیوز) دووربخاتەوە. وابکات هەمیشە بۆ زانینی ئەوەی بڕیار وایە بەدرێژایی رۆژ و رۆژانی دواتر رووبدات بگەڕێتەوە بۆ (رۆژی هیوا جەمال).