رووداو دیجیتاڵ
یاریزانێکی لاوی تۆپی پێی سویسری، بەهۆکارێکی سەیر بڕیاریدا بەیەکجاری واز لە یارییکردن بهێنێت و بڕیارەکەی کاردانەوەی گەورەی لە سۆشیالی میدیا بەدوای خۆیدا هێنا.
سیلڤنا ڤالنەر، یاریزانی تەمەن 22 ساڵی یانەی بلاو ڤایس لینزی سویسری، بڕیاریدا هەموو پەیوەندییەکی خۆی لەگەڵ تۆپی پێ ببڕێت و بەیەکجاری واز لە یارییکردن بهێنێت.
سیلڤان خۆی سویسرییە و یانەکەی لە خولی پلە یەکی نەمسا یارییدەکرد.
ڤالنەر لە وەرزی ئەمساڵدا بەشداری لە 13 یاریدا کرد و لەگەڵ هەڵبژاردەی سویسراوی خوار تەمەنی 21 ساڵیش یارییکردووە.
ئەو یاریزانە سویسرییە کە دوو مانگ لەمەوپێش پەیوەندی بە یانە نەمساوییەکەوە کرد، پێشتر لە یانەی زیوریخ یارییدەکرد و لەناکاو پاشەکشەی لە هەموو شتێکی پەیوەست بەیارییەوە راگەیاند.
رۆژنامەی 'دێرشپیگل'ی ئەڵمانی لە چاوپێکەوتنێکدا لەگەڵ ئەو یاریزانە، هۆکاری وازهێنانی یاریزانەکەی ئاشکراکردووە.
ئەو یاریزانە بە رۆژنامەکەی گوتووە، "من مەسیحی و دیندارم، ئێمە رۆژانی شەممە یان یەکشەممە دەبێ یارییەکانمان ئەنجام بدەین، لە کاتێکدا ئەو رۆژانە، رۆژانی پشوون و بۆ من هەلێکی باشە تاوەکو ئاینداری بکەم، نوێژ بکەم، بچمە کەنیسە و ئینجیل بخوینمەوە".
میلۆس مالینۆڤیچ، بەڕێوەبەری وەرزشیی یانە نەمساوییەکە، کاردانەوەی بەرامبەر بڕیاری وازهێنانی یاریزانەکە دەربڕیوە و بەسوپرایزێکی گەورە ناویبردووە، بەتایبەت کە یاریزانەکە گەنج بووە و لەسەرەتای دەرکەوتنیدا بووە.
سیلڤنا، لە بڕیارەکەیدا، یەکلایەنە گرێبەستەکەی خۆی لەگەڵ یانەکەی هەڵوەشاندووەتەوە و بەیانەکەی گوتووە هیچ بڕە پارەیەک لە یانەکەی وەرناگرێت و نایەوێت چیدی رۆژانی شەممە و یەکشەممە یاریی بکات. ئەوەشی گوتووە کە هیچ پەیوەندییەکی بەیانەکەوە نەماوە و چیدی ناچێتە مەشقەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ