رووداو دیجیتاڵ
یانەی ئامەدسپۆر بەشێوەیەکی فەرمی دوورخستنەوەی سینان کالۆگلو، راهێنەری یانەکەی راگەیاند و بە دوای راهێنەرێکی نوێدا دەگەڕێت.
دوای یەکسانبوونی بەرامبەر یانەی ساکاریاسپۆر، لەو یارییەدا کە 30 هەزار هاندەر تێیدا ئامادەبوون و لە یاریگەی ئامەدسپۆر بەڕێوەچوو، یانەی ئامەدسپۆر دەستبەرداری راهێنەرەکەی بوو.
ئامەدسپۆر لە راگەیێنراوێکی فەرمیدا دەڵێت "دوای ئەوەی کۆبوونەوەیەکمان ئەنجامدا، یانەکە بڕیاریدا دەستبەرداری سینان کالۆگلو، راهێنەری تیپەکە و ستافی راهێنەران ببێت."
یانەکە نووسیوویەتی "سوپاسی سینان کالۆگلو و تیمەکەی دەکەین بۆ ئەو کارەی لە ماوەی رابردوودا کردوویانە و هیوای سەرکەوتنیان بۆ دەخوازین لە ژیانی داهاتوویاندا."
سینان لە 17 یارییدا سەرپەرشتی مەشقدانەوەی ئامەدسپۆری کرد، 10 یاریی بردەوە، لە 4 یارییدا یەکسانبوو و 3 جار دۆڕاوە، بەڵام ویستی ئامەدسپۆر گەیشتنە بە سوپەرلیگ بۆیە دەیەوێت تیپەکەی هێشتا باشتر و بەهێزتر بکات.
بەپێی زانیارییەکانی رووداو سپۆرتس، تاوەکو دۆزینەوەی راهێنەرێکی بەتوانا، تیپەکە لەلایەن راهێنەری کاربەڕێکەرەوە سەرپەرشتی دەکرێت، چەند ناوێک لە پلانەکانی یانەکەدان و کار بۆ هەڵبژاردنی باشترین بژاردە دەکات.
هاندەرانی یانەی ئامەدسپۆر بە دڵگەرمییەکی زۆرەوە چوونە یاریگە، بەڵام بە دڵتەنگییەوە گەڕانەوە، کاتێک یانەکەیان دوو خاڵی لەنێو یاریگە و هاندەرانیدا لەدەستدا، بەشێکی هاندەران هەر زوو داوای دوورخستنەوەی سینان کالۆگلو، راهێنەری یانەکەیان دەکرد، بەشێکی دیکەشیان دەڵێن "بەمشێوەیە یانەکە ناتوانێت رکابەری لەسەر گەیشتن بە سوپەرلیگ بکات."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ