رووداو دیجیتاڵ
رۆناڵد کۆمان، راهێنەری یانەی بارسێلۆنا، دڵخۆشیی خۆی بەرامبەر بردنەوەیان لە رایۆ ڤایکانۆ و گەیشتن بە قۆناخی هەشتی جامی شای ئیسپانیا پێشاندا و گوتی، عەقڵییەتی یاریزانەکانمان بەرەوپێش چووە.
کۆمان دوای بردنەوەیان لە یارییەکە بە دوو گۆڵ بەرامبەر گۆڵێک لە کۆنگرەیەکی رۆژنامەڤانیدا گوتی: " یارییەکی باشمان ئەنجامدا و هەلی زۆرمان لە گێمی یەکەمدا لەدەستدا، لە گێمی دووەمدا کەسایەتیی خۆمان گەڕاندەوە و کاردانەوەی باشمان هەبوو و زۆرباشبووین، عەقڵییەتی یاریزانەکان بەرەوپێش چووە و بەمە دڵخۆشم، سەرەرای ئەوەی کە بەرامبەر تیپێک یارییمانکرد کە پاڵەپەستۆی زۆری خستەسەرمان و یارییەکی قورس بوو.
راهێنەری بارسێلۆنا زیاتر دەڵێت: " دوای ئەنجامی یارییەکانی ماوەی رابردوو متمانەی زیاترمان هەیە، رۆژێک پشوومان لەبەردەمە بۆ ئەوەی ئامادەکاری بۆ یاریی داهاتوو لە خولدا بکەین".
رۆناڵد زیاتر گوتی: " ئێمە لەسەر چیمەنی سرووشتی باشتر یارییدەکەین، لەراستیدا بارینی بەفر لە مەدرید کاریگەریی لەسەر یاریگەکە هەبوو، ئێمە دەمانتوانی گۆڵی زیاتربکەین، بەڵام لەگەڵ ئەوەشدا بە ئەنجامەکە و ئاستی تیپەکە بە کۆمەڵ رازی و دڵخۆشم".
لەبارەی ئەوەی کە ئامانجیان بردنەوەی نازناوی جامی شای ئیسپانیایە؟ کۆمان دەڵێت: " ئامانجی ئێمە ئەوەیە لە هەموو لایەکەوە بەرەوپێشەوە بچین، لە بارسا ئەم عەقڵییەتە هەیە و دەمانەوێت سەرەڕای سەختی بارودۆخەکە رکابەری لەسەر بردنەوەی هەموو نازناوەکان بکەین".
راهێنەری بارسێلۆنا ستایشی ئاستی فرێنکی دی یۆنگی کرد، کە لە 11 یاریی رابردووی یانەکەدا 5 گۆڵی کردووە و گوتی: " دی یۆنگی ئێستا لە هی ئایاکس باشرە، ئەو یاریزانێکی تەواو پێگەیشتووە و هاوکاریی بەرگریکارەکان دەکات و رۆڵێکی گەورەی لە رێکخستنی یارییدا هەیە و ئێستاش زیاتر گۆڵ دەکات، چونکە دەچێتە نێو هێڵی سزای تیپی بەرامبەر، ئەو ئێستا لە باشترین کاتەکانیدایە و پیرۆزبایی ئەم ئاستە بەرزەی لێدەکەم".
کۆمان هۆکاری پێدانی ئەو کارتە زەردەی لە یارییەکەدا پێیدا ئاشکرا دەکات و رایگەیاند، تەنیا لەبەرئەوەی بە ناوبژیوانەکەی گوتووە تۆ هەڵەیت کارتی پێدراوە.
بارسێلۆنا لە دەرەوەی یاریگەی خۆی بە 2-1 لە یانەی رایۆ ڤایکانۆی بردەوە و گەیشتە قۆناخی هەشتی جامی شای ئیسپانیا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ