رووداو دیجیتاڵ
یانەی دهۆک چاوی لە بەدەستهێنانی بردنەوەیەکی دیکەیە کاتێک لە یاریگەی خۆیدا بەرامبەر یانەی نەفت یاری دەکات.
لە درێژەی یارییەکانی گەڕی شەشەمی خولی ئەستێرەکانی عێراق، ئەمشەو کاژێر 20:30 یانەی دهۆک لەنێو یاریگە و هاندەرانیدا میوانداریی یانەی نەفت دەکات و رکابەری لەسەر بەدەستهێنانی دووەم سەرکەوتنی لەسەریەک دەکات.
لە گەڕی رابردوودا دهۆک لە دەرەوەی یاریگەی خۆی جیاواز لە یارییەکانی دیکە بە ئاستێکی بەرزەوە دەرکەوت و یەکەم بردنەوەی لە وەرزەکەدا تۆمارکرد، دوای ئەوەی لە یانەی نەورۆزی بردەوە، ئەمە یەکەم یاریی یانەکە دەبێت لە یاریگەی خۆیدا دوای ئەوەی عەبدولغەنی شەهد بووە راهێنەری یانەکە و چاوەڕواندەکرێت هەزاران هاندەر پاڵپشتیی ئەلهویێن چیا بکەن بۆ بەدەستهێنانی سەرکەوتنێکی دیکە.
یانەی دهۆک لە دوو رۆژی رابردوودا بە ئامانجی خۆ ئامادەکردنێکی باشتر و بەهێزکردنی لایەنی هزری و دەروونیی یاریزانەکانی دوور لە چاوی میدیاکان مەشق و راهێنانی کردووە و تیپەکە بۆ رکابەرییەکە ئامادەیە.
یارییەکە تایبەت دەبێت، لە کاتێکدا لە یانەی دهۆک عەلی یاسین، گۆڵپارێزی یانەکە رووبەڕووی یانەی پێشووی دەبێتەوە و لە یانەی نەفتیش ئیبراهیم غازی، رووبەڕووی یانەی پێشووی دەبێتەوە.
یانەی دهۆک بەر لەم یارییە لە هەنگاوێکی گەورەدا، یەکەم فرۆشگەی تایبەت بە یانەکەی کردەوە، کە کەلوپەلی تایبەت بە یانەکە دەفرۆشێت، رێستورانت و شوێنی پشوو وەرگرتنی تێدایە، جگە لەوەش یاریگەی یانەی دهۆک شاشەی ئەلیکترۆنیی بۆ دانراوە و ئەمڕۆ لەنێو یاریگەی دهۆکدا دیمەنی جوانتر بە یاریگە ببەخشن.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ