ئۆتۆمبێلێکی تێکشکاو دوای بۆردوومانێک بۆسەر ئۆکراینا
رووداو دیجیتاڵ
شەوی رابردوو ناوچەیەکی دەوروبەری کیێڤی پایتەختی ئۆکراینا بۆردوومانکرا، لێکۆڵەرانی ئۆکراینی پارچەیەکیان دۆزییەوە و دەڵێن، هی درۆنی شاهید 136ی ئێرانییە.
ئیڤان کۆبزارینکۆ، هاووڵاتیی تەمەن 83 ساڵی ئۆکراینی دوو نەوەی بە سەختی بریندارن و دەڵێت، "چی بڵێم، دوو نەوەم بریندارن و نازانم بارودۆخیان چۆنە، شەوان بە چڕی بۆردوومان دەکرێین."
بەڕێوەبەرایەتیی سەربازیی شاری کیێڤ رایگەیاند، "23 درۆنی ئێرانی بەسەر ئاسمانی کیێڤدا فڕیون و 18یان خراونەتە خوارەوە". ئەمریکاش دەڵێت، بەشداریکردنی درۆنەکانی ئێران لە شەڕی ئۆکراینا، لەوانەیە بە تاوانی جەنگ هەژمار بکرێت.
جەیک سۆلیڤان، راوێژکاری ئاسایشی نیشتمانیی ئەمریکا دەڵێت، "چەندین سزامان بەسەر ئێراندا سەپاندوون و هەوڵمانداوە ناردنی ئەو فڕۆکانە قورستر بکەین و ناشوەستین تاوەکو ئەو پرۆسەیە بە تەواوەتی کۆتایی پێدەهێنین. درۆنەکانی ئێران دەبنە هۆی کوژرانی خەڵکی سڤیل لە ئۆکراینا و وێستگە کارەباییەکانیان وێران دەکەن، ئەو کارانەش ئێران دەخەنە پێگەیەکەوە کە لەوانەیە تاوانی جەنگی ئەنجامدابێت."
خەرجیی یەک مووشەکی بالیستیی رووسیا یەک ملیۆن دۆلارە، کە ئەو پارەیە 50 درۆنی جۆری شاهیدی ئێرانی دەکات و لانیکەم زیان بە 25 ئامانجی ئۆکراینی دەگەیێنێت.
ئێران نایشارێتەوە درۆنی بە رووسیا فرۆشتبێت، بەڵام رەتیدەکاتەوە لە سەردەمی شەڕەکەدا بووبێت. لەلایەکی دیکەوە هەواڵگریی ئەمریکا پێیوایە لە مانگی تشرینی یەکەمی پارەوە، رووسیا درۆنی ئێرانی دژی ئۆکراینا بەکاردەهێنێت و رۆڵی سەرەکی دەگێڕن لە هێرشکردنە سەر ژێرخانی ئۆکراینا، لەنێویاندا وێستگە کارەباییەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ