Hewlêr (Rûdaw) - Pirtûka dîrokî ya bi navê "Tarîxa Dewleta Kurdan" a ku ji aliyê dîroknas Mihemed ibn Îbrahîmê Xezrecî ve hatiye nivîsandin û ji aliyê Emîn Narozî ve ji Erebî hatiye wergerandin, derket.
Ev pirtûk bûyerên di navbera salên 1175-1257an de vedibêje û bi taybetî li ser Dewleta Eyûbiyan disekine.
Pirtûka "Tarîxa Dewleta Kurdan" a ku ji aliyê Weşanên Avestayê ve hatiye weşandin, yek ji çavkaniyên herî girîng ên ji bo dîroka Dewleta Eyûbiyan a Kurdan e.
Nivîskarê pirtûkê Mihemed ibn Îbrahîmê Xezrecî bi xwe di serdema Selahedînê Eyûbî de jiyaye û agahiyên wî yên li ser Dewleta Eyûbiyan wekî çavkaniyên sereke tên nirxandin.
Dîroknas ev agahî ji şêxên xwe, hevdemên xwe, xwendekarên xwe û hevçaxên xwe kom kiriye û bi nêrîn û çavdêriyên xwe jî xurt kirine.
Di pirtûkê de sal bi sal bûyerên desthilatdariya Dewleta Eyûbiyan carinan bi berfirehî û carinan jî bi kurtî hatine rêzkirin û yek bi yek di beşa her salê de hatine diyarkirin.
Pirtûk her çend li ser Dewleta Eyûbiyan a Kurdan be jî tê de li ser gelek bûyerên derdora Dewleta Eyûbiyan jî hatine rawestandin.
Wekî rikeberiya di navbera Selahedînê Eyûbî û hukimdarên Zengiyan ên piştî Nûredîn Zengî de û hinek bûyerên li ser Dewleta Xwarizmiyan û pêwendiyên wan ên qenc û xerab ên bi Kurd û Moxolan re hatine behskirin.
Di pirtûkê de wekî erdhejên herêmî, êş û webayên herêmî, xela, volkan û rabûna ava çemên mezin ên mîna Nîlê û li ser kar û barên civakî, avedanî, pîrozbahî, şahî û cejnan jî agahî hene.
Pirtûka bi navê "Tarîxa Dewleta Kurdan" ji 472 rûpelan pêk tê.
Ev pirtûk bi taybetî ji bo ronîkirina dîroka Dewleta Eyûbiyan û bi giştî jî li ser dîroka Kurdan yek ji wan çavkaniyên herî girîng e û ji bo lêkolînerên dîrokê û kesên ku eleqeya wan bi dîroka Kurdan re heye çavkaniyeke girîng e.
.jpeg "Bergê pirtûka Tarîxa Dewleta Kurdan")
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse