Hewlêr (Rûdaw) - Serok Mesûd Barzanî û Serokê Yekîtiya Niştimanî ya Kurdistanê (YNK) Bafil Talebanî îro li Pîrmamê civîneke krîtîk pêk anî.
Hat zanîn ku di civînê de namzediya Serokkomariya Îraqê û pêvajoya avakirina kabîneya 10an a Herêma Kurdistanê hatine gotûbêjkirin.
Serok Mesûd Barzanî û Serokê YNKyê Bafil Celal Talebanî, îro li navçeya Pîrmamê yê Hewlêrê civiyan.
Li gorî agahiyên Nûçegihanê Rûdawê Bextiyar Qadir, civîn nêzîkî du demjimêran ajot û saet 16:00an bi dawî bû.
Pêşbaziya Serokkomariyê
Yek ji mijarên herî girîng ên civînê, krîza berdewam a ji bo posta Serokkomariya Îraqê bû.
Niha li Bexdayê ji bo Serokkomariyê 19 namzed hene û namzedên stratejîk ên her du partiyan derdikevin pêş.
Namzedê Partiya Demokrat a Kurdistanê (PDK) Fuad Husên e û YNKyê jî Nîzar Amêdî kiriye namzed.
Di civînê de hat nirxandin bê ka her du partiyên Kurd dikarin li Bexdayê helwesteke hevpar nîşan bidin an na.
Pêvajoya Kabîneya 10an
Mijareke din a sereke ya civînê jî avakirina hikûmeta nû ya Herêma Kurdistanê bû.
Ji ber nakokiyên di navbera PDK û YNKyê yên li ser pêkhate û parvekirina Kabîneya 10an, pêvajoya avakirina hikûmetê dirêj bûbû.
Hat diyarkirin ku ji bo derbaskirina xetimîna siyasî ya di navbera Hewlêr û Silêmaniyê de û ji bo ku kabîneya nû di zûtirîn dem de dest bi kar bike, aliyan di vê civînê de kêşe û girêk gotûbêj kirine.
Hîn jî li ser naveroka civînê daxuyaniyeke fermî nehatiye dayîn lê tê gotin ku civîn ji bo helandina cemedên di navbera her du partiyan de xwedî girîngiyeke krîtîk e.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse