Hewlêr (Rûdaw) - Hêzên Sûriyeya Demokratîk (HSD) nûçeyên ku dibêjin wan meha borî bi aliyên nefermî yên Libnanî re hevdîtin kirine red kir û ew nûçe wekî "derew û çêkirî" bi nav kir.
Berpirsê Navenda Ragihandinê ya HSDyê Ferhad Şamî di daxuyaniyekê de ew îdia red kirin ku behsa pêwendiyên di navbera HSD, Rêveberiya Xweser û kesayetên Libnanî yên di meha çiriya paşîn de dikin.
"Hewldana xapandina raya giştî ye"
Ferhad Şamî di daxuyaniya xwe de got:
"Hinek dezgehên medyayê yên gumanbar çiriya paşîn nûçeyên derew û çêkirî li ser hevdîtinên îdiakirî yên HSD û Rêveberiya Xweser ên bi aliyên nefermî yên Libnanî re belav kirin.
Ev hewldaneke eşkere ya ji bo xapandina raya giştî û şolîkirina rastiyan e."
Şamî tekez kir ku HSD û Rêveberiya Xweser di pêwendî û dan û standinan de nêzîkatiyeke şefaf dimeşînin, bi taybetî di mijarên girêdayî ewlehî, aramî û pirsên mirovî de.
"Pêwendî mafekî rewa ye û nayên veşartin"
Berpirsê Navenda Ragihandinê ya HSDyê diyar kir ku eger pêwendiyek hebe ew bi awayekî eşkere tê kirin û wiha pê de çû:
"HSD û Rêveberiya Xweser tekez dikin ku pêwendiya bi her aliyî re ku xizmeta ewlehî, aramî û mijarên mirovî dike, mafekî rewa û aşkere ye."
Şamî destnîşan kir ku dan û standinên wiha bi dizî an li derveyî kanalên fermî pêk nayên.
"Asta nizmbûna wan nîşan dide"
Ferhad Şamî di dawiya daxuyaniya xwe de ew nûçe wekî "sextekarî" bi nav kirin û got:
"Ev sextekarî dê nikaribe rastiyan biguhere. Belavkirina nûçeyên wiha asta nizmbûna pîşeyî û siyasî ya wan aliyan nîşan dide ku van nûçeyan belav dikin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse