Bayram Bozyel bû mêvanê Rûdawê / Wêne: Rûdaw
Hewlêr (Rûdaw) - Bayram Bozyel diyar kir ku pêvajoya çareseriyê gihîştiye qonaxeke "krîtîk û hestyar".
Serokê Partiya Sosyalîst a Kurdistanê (PSK) Bayram Bozyel diyar kir ku divê gavên berbiçav bên avêtin û destûr bi temamî were guhertin ku mafên Kurdan û nasnameya wan were garantîkirin.
Bayram Bozyel bû mêvanê bultena Rûdawê û pirsên Hêvîdar Zana yên li ser raporên partiyên siyasî û pêvajoya çareseriyê bersivandin.
"Raporên partiyan bi giştî erênî ne"
Bozyel li ser raporên ku partiyên siyasî pêşkêşî Komîsyona Parlamentoyê kirine wiha axivî:
"Partiyan raporên xwe pêşkêş kirin.
Hin hûrgilî hene ku em nizanin lê bi giştî gotar û raporên ku ji aliyê saziyên sivîl, kesayet û navendên lêkolînê ve hatine pêşkêşkirin, ji bo komîsyonê û çareseriya Pirsgirêka Kurdanan girîng bûn.
Ev rapor wekî hafizeyek û xezîneyekê bûn."
Bozyel destnîşan kir ku rapora AK Partiyê û CHPyê naveroka xwe rasterast bi pêvajoya niha ve girê daye û got:
"Bi min rapor xirab nebûn. Min kurteya rapora CHPyê jî xwend.
Mixabin ji bo meseleya Kurdan û çekdanîna PKKyê tiştekî şênber tunebû.
Tenê li ser meseleya qeyûman û hinek pirsgirêkên ku CHPyê eleqedar dikin sekinîne."
"Ev pêvajo ne ya çareseriya Pirsgirêka Kurdan e"
Bozyel bal kişand ser daxuyaniyên rayedarên dewletê û armanca pêvajoyê û wiha pê de çû:
"Ev pêvajo di serî de bi hewcedariya ewlehiyê dest pê kir.
Erdogan, Bahçelî û aliyên dewletê jî dibêjin, ev pêvajo ne pêvajoya çareserkirina Pirsgirêka Kurdan e, pêvajoya çekdanîna PKKyê ye.
Heta Şêwirmendê Serokkomar Mehmet Uçum jî got, 'Li Tirkiyeyê Pirsgirêka Kurdan nîne, tenê pirsgirêka terorê heye'."
"Divê pêvajo bi perspektîfa çareseriya Pirsgirêka Kurdan bimeşe"
Serokê PSKyê tekez kir ku eger pêvajo tenê li ser çekdanînê be, ew dê têrê neke û wiha anî ziman:
"Em dibêjin çekdanîn baş e, bila çekan deynin. Eger bê merc be jî em ne li dijî ne.
Ji ber ku zerer gihîştiye hemû Kurdan; çi li Bakur, çi li Başûr û çi jî li Rojava lê eger koka pirsgirêkê neyê çareserkirin, ev pêvajo dê seqet bimîne.
Derman ji bo dermankirinê têrê nake."
"AK Partî naxwaze pêvajo ji qalibê wan were derxistin"
Bozyel diyar kir ku AK Partî û dewlet naxwazin aliyên din tevlî pêvajoyê bibin û da zanîn:
"AK Partî naxwaze em herin vê meseleyê ji wî rengê ku ew dixwazin derxin.
Ew naxwazin em midaxeleyê bikin an tiştekî nû bibêjin, meseleya Kurd bînin rojevê.
Ji ber vê yekê ew ji nîqaşên berfireh ditirsin û aciz dibin."
"Divê destûr bi temamî were guhertin"
Bayram Bozyel li ser guhertina destûrê jî nêrînên xwe parve kirin û got:
"Divê destûreke nû çêbibe. Yekem, ew hişmendiya ku sed sal e heye divê biguhere.
Ne tenê çend xalên destûrê, divê bi tevahî were guhertin.
Ev destûr piraniya Tirkiyeyê înkar dike; pirzimanî, pirneteweyî û pirmezhebîbûnê înkar dike.
Dibêjin her tişt yek e; yek ziman, yek dewlet, yek milet. Ev ne rastiya Tirkiyeyê ye.
Bêyî meseleya Kurdan jî Tirkiye ne yek milet e."
"Nasnameya Kurdan divê di destûrê de were naskirin"
Bozyel daxwazên sereke yên Kurdan wiha rêz kirin:
"Divê di destûra nû de nasnameya Kurd were qebûlkirin.
Hin akademîsyen dibêjin 'Hewce nake nasnameya Kurdan were qebûlkirin, bes e ku peyva Tirk jê derxin'.
Em vê rast nabînin. Di vê sed salê de mesafeyeke mezin ketiye navbera Tirk û Kurdan.
Îmtiyaza Tirkan heye. Ji ber vê yekê divê navê Kurd li ser destûrê hebe da ku bibe bingehê yasayî û îdarî."
"Zimanê Kurdî stûna meseleya Kurdan e"
Bozyel bal kişand ser girîngiya zimanê Kurdî jî û got:
"Zimanê Kurdî stûna meseleya Kurdan e li Tirkiyeyê.
Divê ev ziman bibe zimanê perwerdeyê û fermî.
Hinek kes dibêjin hewce nake, em akademîsyen bi Kurdî diaxivin.
Bi qenaeta min zimanê Kurdî bi naskirina nasnameya Kurdan ve girêdayî ye û divê wekî mafekî were bicihanîn."
Bozyel di dawiya axaftina xwe de peyameke girîng da û anî ziman:
"Divê Tirkiye bi Kurdên parçeyên din re jî li hev bike.
Nabe ku tu bi Kurdên xwe re dost bî û bi yên Rojavayê re dijmin bî an jî bi Kurdên xwe re li hev werî û bi yên li Îranê re neyartiyê bikî.
Divê polîtîkayeke yekgirtî û aştiyane were meşandin."
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse