Hewlêr (Rûdaw) – Parêzgarê Êlihê, Hulusî Şahîn ku wek Qeyûmê Şaredariya Êlihê hatiye destnîşankirin, nivî û hişyariyên bi Kurdî jê birin.
Qeyûmê Şaredariya Êlihê, bi biryarekê nivîsên bi Kurdî yên li cadeyên nav bajêr ku ji bo hatinûçûna kesên peya hatibûn nivîsandin, jê birin.
Nivîs û agahdarkirinên li ser cadeyan pêştir dema ku şaredarî di destê HDPê de bû, bi herdu zimanên Tirkî û Kurdî hatibûn nivîsandin. Ew nivîs di dema şaredarê HDPyî Mehmet Demir de hatibûn nivîsandin.
Li ser cadeyan bi zimanê Kurdî, Pêşî Peya û bi Zimanê Tirkî Once Yaya hatibûn nivîsandin. Lê bi biryara qeyûm, tenê nivîsên bi Kurdî hatine reşkirin û nivîsên bi Tirkî weke xwe mane.
Jêbirina wan nivîs û agahdarkirinên bi Kurdî yên li ser cadeyên Êlihê (Batman) li ser medyaya civakî rastî bertek û nerazîbûneke mezin hat.
Qeyûmê Şaredariya Êlihê, Hulusî Şahîn pêştir beşa Kurdî ya malpera fermî ya şaredariyê jî rakiribû, lê piştî gelek bertek û nerazîbûnan neçar mabû ku dubare beşa Kurdî ya wê malperê vegerîne.
Her piştî ku qeyûmê Şaredariya Êlihê, şahîn dest bi erkê kir, zimanzanê Kurd, Zana Farqînî ji kar hatibû derxistin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse