Neteweyên Yekbûyî dê alîkariya mirovî bişînî Kobaniyê

Hewlêr (Rûdaw) - Neteweyên Yekbûyî bi hevahengiya bi Parêzgariya Helebê re ji bo Kobaniyê 24 barhilgirên alîkariya mirovî amade kirin.

Parêzgariya Helebê ragihand ku Komîteya Navendî ya Bersivdayînê ya Helebê û rêxistinên Neteweyên Yekbûyî karwanekî ji 24 barhilgirî amade kir da ku bişîne Kobaniyê.

Li gorî Parêzgariya Helebê, di wan barhilgiran de kelûpelên tenduristiyê, mirovî û lojîstîkî hene.

Parêzgariyê amaje pê kir ku karwan ji bo dabînkirina pêdiviyên sereke û xizmetguzariyê, ji bajarê Helebê ber bi Kobaniyê ve bi rê ketiye.

Rojnameger Gandî Dawid îro ji Kobaniyê beşdarî bultena Rûdawê bû û li ser rewşa bajêr agahî dan.

Gandî Dawid got, “10 roj in ku av, elektrîk û înternet li ser bajêr qut bûne. Xelk di nav sermayê de maye û hîna ti alîkarî negihiştine bajêr.”

Gandî Dawid her wiha da zanîn ku li Kobaniyê pileya germê yek e û xelk ji bo ku ava vexwarinê peyda bike berfê dihelîne.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger