Koçberên navxwe yên Sûriyeyê / Wêne: Ji dîmenan
Hewlêr (Rûdaw) - Li gel wêranî û nebûna xizmetguzariyê li bajarokê Hiwaşê yê parêzgeha Humisê, dîsa xelk dixwaze vegere malên xwe.
Piştî rûxîna rejîma Beşar Esed, koçber ji kampan derdikevin û vedigerin navçeyên xwe yên resen.
Koçberê vegeriyayî Arif Şemtan got:
“Li vê derê hest bi kêfxweşiyê dikim, her wiha di nav vê kavilbûnê de jî jiyana li vir, baştir e ji wê ya ku di nav kampan de bijîn."
“Ya girîng ew e vegeriyam”
Koçberê vegeriyayî Ebdulxefûr Xetab jî got, “Vegeriyam, ji ber ku ji gundê xwe hez dikim.
Gundê min hatiye rizgarkirin, çima venegerim? Ji ber wê vegeriyam û min çadir veda.
Ya girîng ew e vegeriyam. Xwedê rê da şoreşa mezin çêbibe û em jî piştî rizgarkirinê vegeriyan."
Piştî rûxîna rejîma Esed û hatina ser desthilatê ya hikûmeta nû li Şamê, pêla bicihhiştina kampan û vegera koçberên nav xwe yên Sûriyê bo navçeyên wan dest pê kiriye.
Ji 8ê Kanûna Pêşîn a 2024an ve, zêdeyî mllyonek û 800 hezar koçber û penaberên Sûriyeyî vegeriyane herêmên xwe.
Di nav wê hejmarê de, herî kêm mîlyonek koçberên navxwe yên Sûriyeyê vegeriyane ser mal û milkên xwe.
“Xelk naxwaze li kampan bimîne”
Koçberê niştecihê yek ji kampên Sûriyeyê Celal Omer jî got:
“Piraniya xelkê naxwaze li kampan de bimîne. Ew dixwazin vegerin gundên xwe lê sedema ku venagerin ew e, pêwîstî û xizmetgûzariyên destpêkê yên wekî jêrxan, elektrîk, kanalîzasyon, av û nan nîni.
Pêdiviyên herî sereke yên jiyanê, li gund û gundikan nînin.”
Neteweyên Yekbûyî amaje bi wê yekê dide ku ligel berdewamiya pêla bicihhiştina kampan lê hîn jî zêdeyî 6 mîlyon kes koçberên navxwe li wî welatî mane ku ji sedî 90ê niştecihên wê di bin xeta hejariyê de ne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse