Hewlêr (Rûdaw) - Serokerkanê Artêşa Almanyayê Carsten Breuer û Serokerkanê Artêşa Brîtanyayê Richard Knighton hişyarî da ku Rûsyayê ji şerê Ukraynayê ders derxistine û xwe ji bo şerê bi NATOyê re amade dike.
Wan diyar kir ku Rûsya hêzên xwe yên çekdar ji nû ve birêxistin dike û ev yek dikare rîska şerê bi welatên NATOyê re zêde bike.
Serokerkanê Artêşa Almanyayê Carsten Breuer û Serokerkanê Artêşa Brîtanyayê Richard Knighton di nameyeke hevpar de bal kişand ser metirsiyên ewlehiyê yên li ser Ewropayê.
Name di rojnameya The Guardian a Brîtanyayê û Die Welt a Almanyayê de hat weşandin.
“Artêşa Rûsyayê xwe ji nû ve birêxistin dike”
Di nameyê de hat diyarkirin ku Hêzên Çekdar ên Rûsyayê li gorî ezmûnên şerê Ukraynayê ducare xwe çekdar dikin û hêzên xwe ji nû ve birêxistin dikin.
Fermandaran got:
"Hêzên Çekdar ên Rûsyayê ducare xwe çekdar dikin û bi derxistina dersan ji şerê Ukraynayê xwe bi awayekî wisa birêxistin dikin ku dikare rîska şerê bi welatên NATOyê re zêde bike."
Hat destnîşankirin ku zêdekirina kapasîteya leşkerî ya Rûsyayê rîska şerekî nû li parzemîna Ewropayê bi xwe re tîne wekî ku di şerê Ukraynayê de jî xuya bû.
Banga zêdekirina lêçûnên parastinê
Breuer û Knighton diyar kir ku ji ber gefên li ser Ewropayê pêdivî bi guherînên lezgîn di polîtîkayên parastin û ewlehiyê de heye.
Fermandaran anî zimên ku divê di çarçoveya NATOyê de lêçûnên parastinê ya hilberîna navxweyî ya giştî (GDP) bên zêdekirin.
Wan da zanîn ku çekdarbûn nayê wateya teşwîqkirina şer, hêz êrişkirinê dide sekinandin, lawazî jî vedixwîne.
“Pîşesaziya parastinê ya bi hêz şert e”
Fermandaran her wiha tekez kir ku ji bo domandina amadehiya leşkerî avakirina pîşesaziyeke parastinê ya Ewropayê ya bi hêz xwedî girîngiyeke krîtîk e.
Ev nameya hevpar di demekê de hat belavkirin ku şerê Rûsya û Ukraynayê dikeve sala sêyemîn.
Name wekî nîşaneke nû ya zêdebûna dilgiraniyên ewlehiyê yên li Ewropayê tê nirxandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse