Hewlêr (Rûdaw) - Serokkomarê Tirkiyeyê Recep Tayyîp Erdogan di hevdîtina xwe ya bi Serokkomarê Fransayê Emmanuel Macron re diyar kir ku diyaloga bi Fransayê re ji bo Tirkiyeyê girîng e û ew dê xebatên xwe yên ji bo bi pêşxistina hevkariyê di gelek waran de, di serî de bazirganî, enerjî û pîşesaziya parastinê, bidomînin.
Serokkomarê Fransayê Emmanuel Macronê ku ji bo Civîna 80yemîn a Konseya Giştî ya Neteweyên Yekbûyî li New Yorkê ye bi Serokkomarê Tirkiyeyê Recep Tayyîp Erdogan û Serokkomarê Sûriyeyê Ehmed Şer re civiya.
Serokatiya Ragihandinê ya Serokkomariya Tirkiyeyê derbarê hevdîtina Macron û Erdogan daxuyaniyek belav kir.
Di daxuyaniyê de hat ragihandin ku di hevdîtinê de pêwendiyên dualî yên Tirkiye û Fransayê û mijarên herêmî û cîhanî hatine gotûbêjkirin.
Erdogan di hevdîtina xwe ya bi Macron re de diyar kir ku diyaloga bi Fransayê re ji bo Tirkiyeyê girîng e û ew dê xebatên xwe yên ji bo bi pêşxistina hevkariyê di gelek waran de, di serî de bazirganî, enerjî û pîşesaziya parastinê, bidomînin.
Pêwendiyên bi Yekîtiya Ewropayê re
Erdogan tekezî li ser wê yekê kir ku Tirkiye ji bo vejandin û bipêşxistina pêwendiyên bi Yekîtiya Ewropayê re bi biryar e û anî ziman ku ji bo vê yekê divê demildest mekanîzmayên pêwîst werin xebitandin.
Serokkomarê Tirkiyeyê her wiha da zanîn ku Tirkiye ji bo aştiyeke dadmend û mayînde ya di navbera Rûsya û Ukraynayê de hewleke mezin dide û ew dixwazin dan û standinên ku li Stenbolê hatibûn kirin bi awayekî encamgir bi pêş bixin.
Çareseriya du dewletî
Erdogan, Macron ji ber biryara Fransayê ya naskirina Filistînê wekî dewlet pîroz kir û destnîşan kir ku ji bo çareseriya du dewletî, zêdekirina zexta navneteweyî ya li ser rêveberiya Netanyahu dikare encamê bide û di vê mijarê de girîng e ku pêwendiya di navbera Tirkiye û Fransayê de berdewam bike.
Erdogan û Macron li ser rewşa dawî ya Sûriyeyê, dijminatiya biyaniyan a ku li Ewropayê belav dibe û sûcên nefretê jî nêrînên xwe parve kirin.
Macron û Şer civiyan
Serokkomarê Sûriyeyê Ehmed Şera li bajarê New Yorkê yê Amerîkayê bi Serokkomarê Fransayê Emmanuel Macron re civiya.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse