رووداو دیجیتاڵ
سەرۆکوەزیرانی هەرێمی کوردستان رایگەیاند، "دەبێ رێز لە قەوارەی دەستووریی هەرێمی کوردستان بگیرێت و مووچە و شایستە داراییەکانی خەڵکی کوردستان بنێردرێت".
مەسرور بارزانی، سەرۆکوەزیرانی هەرێمی کوردستان لە داڤۆس لەگەڵ ژان نۆوێل بارۆ، وەزیری ئەورووپا و کاروباری دەرەوەی فەرەنسا کۆبووەوە. یەکێک لەو تەوەرانەی قسەیان لەسەر کردووە، کێشەکانی نێوان هەولێر و بەغدا بوو. باسیان لە پەیوەندییەکانی نێوان هەرێمی کوردستان و فەرەنساش کردووە.
مەسرور بارزانی "دووپاتی کردەوە هەرێمی کوردستان، ئەرک و پابەندییە دەستوورییەکانی خۆی بە تەواوی جێبەجێ کردووە، بۆیە پێویستە مافەکانی خەڵکی کوردستان پێشێل نەکرێت و دەبێ رێز لە قەوارەی دەستووریی هەرێمی کوردستان بگیرێت و مووچە و شایستە داراییەکانی خەڵکی کوردستان بنێردرێت".
بەگوێرەی راگەیێندراوێکی حکومەت، مەسرور بارزانی "ئاماژەی بە پەیوەندیی دۆستانەی فەرەنسا و هەرێمی کوردستان کرد و سوپاسی پشتیوانیی بەردەوامی حکومەت و گەلی فەرەنسای لە گەلی کوردستان کرد".
لە کۆبوونەوەدا، گفتوگۆ لەبارەی پەرەپێدانی پەیوەنديی دوولایەنە و سەرکەوتنی پرۆسەی هەڵبژاردنی پەرلەمانی کوردستان و هەوڵەکانی پێکهێنانی کابینەی نوێی حکومەت و گرنگیی چارەسەرکردنی کێشەکانی هەرێمی کوردستان و حکومەتی فیدراڵ کرا. ئەمە وەکو حکومەت باسی دەکات.
لە راگەیێندراوەکەدا هاتووە: "لە بەشێکی دیکەی گفتوگۆکاندا، بیروڕا لەبارەی گۆڕانکارییەکانی سووریا و رۆژهەڵاتی ناوەڕاست ئاڵوگۆڕ کرا".
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ