کۆنسێرتی گرووپی نیشتمان لە فەرەنسا
رووداو دیجیتاڵ
گرووپی میوزیکی نیشتمان، بە سپۆنسەری تۆڕی میدیایی رووداو، سێ کۆنسێرتیان لە فەرەنسا سازکرد و فەرەنسییەکان پێشوازییەکی بەرچاویان لێکرد.
لە دوای پێشکێشکردنی پڕۆژەی یەک و دووی نیشتمان لە 50 فێستیڤاڵی نێودەوڵەتیدا، ئەمجارە سێیەم پڕۆژەی بەناوی "نەورۆز" خستە بەر گوێی فەرەنسییەکان.
لە گەشتێکی هونەریی گرووپی نیشتمان بۆ فەرەنسا، سێ کۆنسێرتیان لە هۆڵە ئۆپێراییەکانی شاری ئۆنژێ، نانت و پێریگو، لە 5-7ـی حوزەیرانی 2024 پێشکێشکرد.
پڕۆژەی سێیەمی گرووپی نیشتمان بە ناوی "نەورۆز"ـە و بە "نیشتمان سێ"ـش دەناسرێت و لە 2022ـدا بڵاوکرایەوە، پڕۆژەی یەکەمی لە 2013 و دووەمی لە 2016ـدا بڵاوکرایەوە.
لە کۆنسێرتەکاندا هەژار زەهاوی وەک سەرپەرشتیاری گرووپ و ژەنیاری دەف، ئەیوب عەلی وەک گۆرانیبێژی سەرەکی، گۆران کامیل، ئاوازدانەر و ژەنیاری عوود، رۆبن ڤاسی بە ئامێرە ریتمییەکان، میلاد محەممەدی بە ئامێری تار، مستەفا تالیب بە ئامیری کەمانچە و ئەرتان تەکین بە ئامێری زوڕنا بەشداربوون.
ئامادەبووان دڵخۆش بوون و دەنگی چەپڵەیان لە نێو هۆڵەکەدا بەرزبووەوە، ئەمەش لە دوای بیستنی میوزیک و گۆرانی کوردی کە لەلایەن گرووپی نیشتمان پێشکێشکرا.
لە دوای کۆتاییهاتنی کۆنسێرتەکانیش، بەشێک لە ئامادەبووان بەرهەمەکانی گرووپەکەیان کڕی و لەلایەن ئەندامانی گرووپەکەوە واژۆیان لەسەر کرا و وێنەیان لەگەڵ ئەندامانی گرووپەکەدا گرت.
سۆران نەقشبەندی، نووسەر و رۆژنامەنووس لە گەشتە هونەرییەکەی گرووپی نیشتماندا یاوەری گرووپەکە بووە.
ئامانجی گرووپی نیشتمانە میوزیکی کوردی زیاتر بە جیهان بناسێنت، بەرهەمەکانیشی لەلایەن کۆمپانیای فەرەنسیی ئاکۆر کروازێ بڵاودەکرێنەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ