رووداو دیجیتاڵ
تۆڕی نێتفلێکس، بەڵگەفیلمێک لەبارەی ژیان و هونەری کانیێ وێست، راپەری ئەمریکی، بڵاودەکاتەوە و بڕیارە ئەم بەرهەمە لە یەکێک لە فیستیڤاڵە سینەماییەکانی ئەمریکاش پیشانبدرێت.
ئەم بەرهەمە بەناوی 'jeen-yuhs: A Kanye Trilogy'یە و لە چوارچێوەی چالاکییەکانی فیستیڤاڵی نێودەوڵەتیی فیلمی سەنداس لە ئەمریکا بەشدار دەبێت کە لە 20-30 ئەم مانگە بەڕێوەدەچێت.
ماوەی ئەم بەرهەمە چوار کاژێر و 30 خولەکە و لە 16-2-2022 بە سێ بەش لە نێتفلێکس بڵاودەکرێتەوە و لە 10 هەمان مانگ لە سینەماکانی ئەمریکا نمایشدەکرێت.
بەڵگەفیلمەکە چەند دیمەنێکی ڤیدیۆیی وێستگە جیا جیاکانی ژیان و کارە هونەرییەکانی ئەو راپەر و دیزاینەرە لەخۆدەگرێت، تاوەکو دەگاتە قۆناخی بەناوبانگبوونی.
کانیێ وێست، لە 8-7-1977 لە ئەمریکا لە دایکبووە، راپەر و دیزاینەری جلوبەرگە، زیاتر لە 21 ملیۆن ئەلبوومی چاپکراو و 100 ملیۆن کۆپی دیجیتاڵی لە بەرهەمەکانی فرۆشراون و براوەی چەندین خەڵاتی میوزیکییە، لەوانە 22 خەڵاتی گرامی.
دەستپێکی کاری هونەریی لە بواری میوزیکدا لە رێگەی بەرهەمهێنان بووە و لە 2001 لەرێگەی گۆرانی 'BluePrint' بەناوبانگ بوو کە بۆ جەی زەی، راپەری ئەمریکی ئامادەی کردبوو.
لە 2004 یەکەم ئەلبوومی گۆرانیی بەناوی 'The College Dropout' بڵاوکردەوە، لە 2005 ئەلبوومی 'Late Registration' و لە 2007 ئەلبوومی 'Graduation' بڵاوکردەوە، لە 2013 لە رێگەی شەشەم ئەلبوومی بەناوی 'Yeezus' ناوبانگییەکی جیهانی بەدەستهێنا.
لە 2020 خۆی بۆ پۆستی سەرۆکی ئەمریکا بەربژێرکرد و لێدوانەکانی لە کاتی بانگەشی هەڵبژاردندا هاوژینەکەی کیم کارداشیانی توڕەکرد و جیابوونەوەیانی بەدوای خۆیدا هێنا.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ