دیمەنێک لە ڤیدیۆکلیپی (حەیران دێ رابە)
رووداو دیجیتاڵ
گرووپی میوزیکی جۆلەمێرگ کۆلێکتیڤ لە جۆلەمێرگی باکووری کوردستان، بەرهەمێکی نوێی بەناوی (حەیران دێ رابە) بڵاوکردەوە، ئەویش نوێکردنەوەی گۆرانییەکی فۆلکلۆریی ناوچەی جۆلەمێرگە و بە میوزیکێکی نوێ کاری بۆ کراوە و بە دەنگی ئیمرا ئایدن و موسا ئەرتوش گوتراوەتەوە.
موسا ئەرتوش، گۆرانیبێژی بەرهەمەکە بە تۆڕی میدیایی رووداوی راگەیاند: (حەیران دێ رابە) یەکێکە لە بەرهەمە فۆلکلۆرییە دیارەکانی ناوچەی جۆلەمێرگ و ناوەڕۆکێکی سۆزداری هەیە.
لەبارەی چیرۆکی گۆرانییەکەشەوە دەڵێت: "گۆرانییەکە لەلایەن کەسێکەوە بۆ خۆشەویستەکەی گوتراوە، تێیدا داوای لێدەکات پێکەوە بچنە کوێستانەکان".
جۆلەمێرگ کۆلێکتیڤ، گرووپێکی میوزیکییە لە جۆلەمێرگی باکووری کوردستان، ئامانجی سەرەکییان کارکردنە لەسەر نوێکردنەوەی بەرهەمە فۆلکلۆرییەکانی کوردی بەگشتی و ناوچەی جۆلەمێرگ بەتایبەتی.
ئیمرا ئایدن، ئەندامی گرووپەکە کە هاوکات کاری دابەشکردنی میوزیکی بۆ گۆرانییەکە کردووە، بە رووداوی گوت: (دێ رابە حەیران) تێکست و ئاوازەکەی فۆلکلۆری ناوچەی جۆلەمێرگە، لەگەڵ هونەرمەند قادر کلنچ کاری میوزیکیان بۆ کردووە.
کاری دابەشکردنی میوزیک و تۆمارکردنی لەلایەن ئیمرا ئایدن و کاری میکس و ماستەرینگی لەلایەن ئیرمان ئایدۆنەر بۆ کراوە.
کاری دەرهێنان و مۆنتاژی ڤیدیۆکلیپی گۆرانییەکە لەلایەن ئیرهان کاراهان و عومەر کاپلان ئەنجامدراوە و لە تەواوی پلاتفۆڕمە دیجیتاڵییەکان بڵاوکراوەتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ