دکتۆر لونا خالید - د. ساڵح نەجیب
رووداو - تەندروستی
پسپۆڕێکی ژینگە رایگەیاند، لێکەوتەکانی جەنگ لەسەر کۆئەندامی هەناسە زۆرن و بەگوێرەی جۆری تەقەمەنییەکە کاریگەرییەکانیان دەگۆڕێت.
ئەمڕۆ دووشەممە 9-3-2026 د. ساڵح نەجیب، پسپۆڕی ژینگە لە بوڵتەنی تەندروستی رایگەیاند تەقەمەنییەکان کۆمەڵێک پێکهاتەی مەترسیدار دەردەدەن و هەندێکجار مادەی تیشکاوەریشی تێدایە کە مەترسییەکان زیاتر دەکات، ئەو پێکهاتە کیمیاییانەی نێو تەقەمەنییەکان رێگری دەکەن لە گەیشتنی ئۆکسجینی پێویست بە ئەندامەکانی جەستە، کاتێکیش کۆئەندامی هەناسە لاواز و ناتەندروست بوو، کاریگەریی لەسەر کۆئەندامەکانی دیکەش دەبێت.
ئەو پسپۆڕەی ژینگە هۆشداریی دا لە پیسبوونی هەوا و گوتی، "بەرگە هەوا سیستمێکی داینامیکی گۆڕاوە، کاتێک هەر پێکهاتەیەکی گازی دەچێتە نێو هەوا، پێکهاتەی نوێی زیانبەخش دروستدەکات و کاریگەری لەسەر کۆئەندامی هەناسە دەبێت."
د. ساڵح نەجیب نموونەی بە پیسبوونی هەوای تاران هێنایەوە کە دەکرێت کاریگەریی هەبێت لەسەر هەرێمی کوردستان و تێکەڵی بەرهەمە رووەکی و خۆراکییەکان ببێت.
د. ساڵح نەجیب باسی لە رێکارەکانی خۆپارێزی کرد و گوتی، "رووپۆشی سەوزایی کاریگەریی زۆری هەیە لە کەمکردنەوەی هەوای پیس، منداڵان و بەساڵاچووان زیاتر کاریگەریی هەوای پیسیان لەسەرە، بۆیە باشترە ماسک بەکاربهێنن بۆ داپۆشینی قورگ، لووت و دەمیان."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ