رووداو دیجیتاڵ
دەزگای ئاسایشی هەرێمی کوردستان دەڵێت، بەڕێوەبەرایەتیی ئاسایشی پارێزگای سلێمانی 19 کەسیان بە تۆمەتی فریودانی هاووڵاتییان و ئەنجامدانی نووشتە و جادوو دەستگیرکردووە.
رۆژی شەممە، 4-11-2023، دەزگای ئاسایشی هەرێمی کوردستان رایگەیاند، هێزەکانی ئاسایش دوای لێکۆڵینەوە و بەدواداچوونی ورد، لەپێناو پاراستنی ئاسایشی کۆمەڵایەتی و ڕێگریکردن لە فریودانی هاووڵاتییان، لەچەند ڕۆژی رابردوودا بەبڕیاری دادوەری لێکۆڵینەوەی ئاسایش لەچەند هەڵمەتێکدا 19 کەسیان بەتۆمەتی ئەنجامدانی کاری نووشتە و جادوو دەستگیرکرد.
بەگوێرەی دەزگای ئاسایشی هەرێمی کوردستان، لەکاتی دەستگیرکردنیان دەستگیراوە بەسەر سەرجەم ئەو کەلوپەلانەی کە بۆ مەبەستی نووشتەکردن و هەڵخەڵەتاندنی هاووڵاتییان بەکاریانهێناوە بۆ دەستکەوتنی بڕێک پارە.
ئەوەشی خستووەتەڕوو کە ئێستا سەرجەم ئەو تۆمەتبارانە راگیراون و لێکۆڵینەوە لە دۆسیەکانیان بەردەوامە.
ئەوەش پاش ئەوەدێت، 28ـی ئۆکتۆبەری 2023، بەڕێوەبەرایەتیی گشتیی ئاسایشی سلێمانی لە راگەیێندراوێکدا بڵاویکردەوە، بەڕێوەبەرایەتیی ئاسایشی شارەزوور و بەڕێوەبەرایەتیی ئاسایشی رۆژئاوای سلێمانی لە پارێزگای هەڵەبجە و قەزای بازیان، بە تۆمەتی فریودان و سیحر و نووشتە و جادوو، دوو کەسیان دەستگیرکردووە.
پێشتریش، بەڕێوەبەرایەتیی گشتیی ئاسایشی سلێمانی رایگەیاند، لە 25ـی ئایار لە قەزای چەمچەماڵ حەوت کەسیان لە ئەندامانی خێزانێک دەستگیرکردووە، کە بە رێگە و مەبەستی جیاواز، جادوو و نووشتەیان بۆ هاووڵاتییان کردووە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ