رووداو دیجیتاڵ
دوای ئەوەی بەیانیی ئەمڕۆ دووشەممە قەیووم بۆ شارەوانیی شاری ئێلیهـی باکووری کوردستان دانرا، گرژی و ئاڵۆزی لەنێوان هێزە ئەمنییەکان و بەشێک لە هاونیشتمانییان لەبەردەم باڵەخانەی شارەوانی روویدا.
هاوسەرۆکی شارەوانیی ئێلیهـ و ژمارەیەک لە خەڵکی شارەکە بەیانیی ئەمڕۆ دووشەممە 4ی تشرینی دووەم لەبەردەم باڵەخانەی شارەوانی کۆبوونەوە و داوایان لە هێزە ئەمنییەکان کرد شوێنەکە چۆڵ بکەن. هێزە ئەمنییەکان ئەو داواکارییەیان رەتکردەوە و بەو هۆیەوە گرژی و ئاڵۆزی لەنێوان خەڵک و هێزە ئەمنییەکاندا روویدا.
بەیانیی ئەمڕۆ سۆنگول سۆنوک، هاوسەرۆکی شارەوانیی ئێلیهـ بە بڕیاری وەزارەتی ناوخۆی تورکیا لە کارەکەی دوورخرایەوە و ئەکرەم جانئاڵپ، پارێزگاری ئێلیهـ بە قەیووم لە شوێنی دانرا.
هاوسەرۆکی شارەوانیی ئێلیهـ گوتی، ئەو بڕیارە نایاساییە قبووڵ ناکەن و رێگە نادەن ئیرادەی خەڵک پێشێل بکرێت.
لە هەژماری تایبەتی خۆی لە تۆڕی کۆمەڵایەتیی ئێکس سۆنوک پەیامێکی بڵاوکردەوە و رایگەیاند، "لە هەڵبژاردنەکانی 31ی ئاداردا بە بەدەستهێنانی زۆرترین ژمارە لە تورکیا پۆستی سەرۆکی شارەوانیمان بردەوە، بەڵام بەبێ ئەوەی هیچ شتێک بگوترێت، سەرلەبەیانیی ئەمڕۆ ئیرادە پێشێل کرا. ئێمە هەرگیز ئەم رژێمە تاڵانکار و زەوتکارەمان قبووڵ نەکردووە و ئێستاش قبووڵی ناکەین."
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ