رووداو دیجیتاڵ
فیدراسیۆنی کۆمەڵەی ژنانی تورکیا رایگەیاند، لە مانگی ئایاری ئەمساڵدا 30 ژن لە تورکیا و باکووری کوردستان کوژراون.
فیدراسیۆنەکە ئەمڕۆ پێنجشەممە پێنجی حوزەیرانی 2025 راپۆرتی کوژرانی ژنانی بۆ مانگی ئایار بڵاوکردەوە. بەگوێرەی راپۆرتەکە، لە مانگی ئایاردا لە تورکیا و باکووری کوردستان 30 ژن کوژراون کە تەمەنیان لەنێوان 19 بۆ 65 ساڵدایە.
لە کۆی ئەو 30 ژنەی کە کوژراون، 13 ژن هاوسەرگیریان کردووە، حەوت کەسیان زگورت بوون، پێنجیان بێوەژن بوون.
ئەو ژنانە 10یان لەلایەن کەسوکاریانەوە کوژراون، شەش ژن لەلایەن هاوسەری پێشوویان کە لە جیابوونەوەدابوون، چوار ژن لەلایەن خۆشەویستەکانیانەوە، دوو ژن بەهۆی رەتکردنەوەی داواکاری خۆشەویستی و هاوژینی، دوو ژن لەلایەن ئەو پیاوانەوە کوژراون کە دەیانناسن.
ئەو ژنانە 17یان لە ماڵەکانیان، چوار لە شوێنە گشتییەکان، چوار لە شوێنی کار و دوو ژنیش لە چۆڵەوانی کوژراون.
لەلایەکی دیکەوە، بەگوێرەی راپۆرتی پلاتفۆرمی 'تاوانی دژ بە ژنان دەوەستێنین'، لە مانگی ئایاری ئەمساڵدا 41 ژن لە تورکیا و باکووری کوردستان کوژراون، کە کوژرانی 20یان گوماناوییە.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ