رووداو دیجیتاڵ
گوتەبێژی پۆلیسی کەرکووک رایگەیاند، لە خۆپێشاندانەکانی دوێنێ شەوی گەڕەکی شۆریجەی کەرکووک، نۆ خۆپێشاندەر دەستگیکراون و سێ ئەندامی هێزە ئەمنیەکان بە بەرد برینداربوون. دەشڵێت، "دۆخی شارەکە هێوربووەتەوە".
رۆژی سێشەممە، 5-9-2023، موقەدەم عامر شوانی، گوتەبێژی بەڕێوەبەرایەتی پۆلیسی پارێزگای کەرکووک بە تۆڕی میدیایی رووداوی راگەیاند، "دوێنێ شەو ژمارەیەک هاووڵاتی خۆپێشاندانیان کرد و بەداخەوە ژمارەیەک حاویەی زبڵ سووتێنران و چەند شەقامێک گیران، لە ئەنجامی گرژییەکانیشدا سێ ئەندامی هێزە ئەمنیەکان برینداربوون لەنێویاندا لیوا عەبدولرەزاق نعێمی، جێگری فەرماندەیی ئۆپەڕاسیۆنەکانی کەرکووک و عەمید مازن غەریب، بەڕێوەبەری پۆلیسی فریاکەوتنی کەرکووک و پۆلیسێکی دیکە."
گوتیشی" بەهۆی ئەوەی تەقە لە هێزە ئەمنیەکان کرا، نۆ کەس دەستگیرکراون."
ئەو بەرپرسەی پۆلیسی کەرکووک باسی لەوەکرد، ئەوان نایانەوێت هیچ کەس بەهۆی خۆپێشاندانەکانەوە زیانی پێبگات و گرژی بکەوێتە نێوان هێزە ئەمنییەکان و دانیشتووانی شارەکە.
سەبارەت بە رەوشی ئەمڕۆی کەرکووک، گوتەبێژی بەڕێوەبەرایەتیی پۆلیس ئاشکرایکرد، "تاوەکو کاژێر یەک و نیوی بەرەبەیانی ئەمڕۆ سەرقاڵی رێکخستنەوە و هێورکردنەوەی دۆخەکە بووین، هەموو شەقامەکان پاککرانەوە و هەموو شتێک ئاسایی بووەتەوە، ئێستا دۆخەکە هێمن بووەتەوە."
داواشی لە خۆپێشاندەران کرد ئەگەر خۆپێشاندان دەکەن ئاگاداری دۆخی ئەمنی بن و گوتی، "دەبێت بەهۆشیارییەوە خۆپێشاندان بکەن و هێمنانە بێت، نابێت پشێوی لێبکەوێتەوە، چونکە ئێمە نامانەوێت خوێنی هیچ کەسێک بڕژێت و هیچ شوێنێکی گشتی زیانی پێبگات."
سەبارەت بە تەقەکردنی هێزە ئەمنیەکان وەکو لە گرتە ڤیدیۆییەکاندا دەردەکەوێت بە نێو کۆڵانەکاندا تەقە بەسەر خۆپێشاندەراندا دەکەن، موقەدەم عامر شوانی گوتی: "بەهۆی ئەوە بوو لەنێو خۆپێشاندەرانەوە خەڵکانێک هەبوون تەقەیان لە هێزە ئەمنیەکان کردووە، بۆیە هێزە ئەمنیەکانیش وەڵامیان دانەوە."
گوتەبیژی پۆلیسی کەرکووک دەڵێت: "بەهیچ شێوەیەک ئاڵای عێراق نەسووتێنراوە."
دوێنێ شەو لە گەڕەکی شۆریجەی کەرکووک کە گەڕەکێکی زۆرینە کوردی شارەکەیە، ژمارەیەک کەس خۆپێشاندانیان کرد و بەشێکیان ئاڵای کوردستانیان بەرزکردووەوە و داوایان دەکرد لێپرسینەوە لەو کەسانە بکرێت کە بوونەتە هۆی کوژرانی چوار هاونیشتمانی کە رۆژی دووی ئەیلوول کوژران.
لە 27ـی ئابی 2023ـەوە بەشێک لە تورکمان و عەرەبی کەرکووک رێگەی سەرەکیی شارەکەیان لەگەڵ هەولێر داخست. ئەوان دژى رادەستکردنەوەى بارەگاى ئەنجوومەنى سەرکردایەتیى پارتى دیموکراتى کوردستانن لەو شارە کە ئێستا بارەگاى ئۆپەراسیۆنەکانى کەرکووکە.
بەهۆى ئەو رێگە داخستنەوە، رۆژی 2-9-2023 ژمارەیەک هاونیشتمانیی کوردی کەرکووک خۆپێشاندانیان کرد و چوار خۆپێشاندەر بە گولـلە گیانیان لەدەستدا و 16ـی کەسی دیکەش برینداربوون.
3ـی ئەیلوولی 2023، محەممەد شیاع سوودانى، سەرۆکوەزیرانى عێراق لەگەڵ پەرلەمانتارانى پشکى کەرکووک کۆبووەوە کە نوێنەرى سەرجەم پێکهاتەکانى ئەو شارەى تێدابوو.
کۆمێنتەکان
وەک میوان کۆمێنتێك بنووسە یان وەرە ژوورەوە و ههموو خزمەتگوزارییەکان بهكاربێنه
کۆمێنتێک دابنێ