ئاسایشی هەولێر: زیرەک عەلی بەهۆی وەستانی دڵییەوە گیانی لەدەستداوە

 

ئەمڕۆ چوارشەممە، 07-06-2023، ئاسایشی هەولێر لە روونکردنەوەکەیدا ئاشکرایکرد، ئەو هاونیشتمانییە لە رۆژی 5ی 6ی 2023 کە نیشتەجێی گەڕەكی (سێتاقان) بووە، "هێرشی كردووەتە سەر كۆمپانیایەك و ویستوویەتی بەزۆر پارە لەو كۆمپانیایە وەربگرێت، بۆیە بە پێویستمان زانیوە لە لامان ئامادە بكرێت."

 

وەکو ئاسایشی هەولێر لە روونکردنەوەکەیدا ئاماژەی پێکردووە، ئەو هاونیشتمانییە لە یەکێک لە بنکەکانی ناوشار ئامادە بووە و "بەبێ بەکارهێنانی هیچ تووندتوتیژییەک لێکۆڵینەوەی لەگەڵدا کراوە، دوای لێکۆڵینەوەی سەرەتایی، دواتر لە بەڕێوەبەرایەتیی ئاسایشی ناوشار باری تەندروستی تێكچووە و دەستبەجێ رەوانەی نەخۆشخانە کراوە، بەڵام گیانی لەدەستداوە و خانەوادەکەیان لەو بابەتە ئاگادارکرانەوە."

 

دوای گیانلەدەستدانی زیرەک عەلی، تەرمەکەی رەوانەی دادپزیشکی هەولێر کراوە. ئاسایشی هەولێر دەڵێت، "تێمێکی پزیشکی دادی لە شاری سلێمانییەوە هاتن و بەشداربوون لە توێکاری و هۆکاری گیان لەدەستدانەکەی. لە دەرئەنجامی راپۆرتی پزیشکی دادی، دەرکەوت کە هاووڵاتی (زیرەک عەلی) بە هۆکاری (وەستانی دڵ/ الجلطة القلبية) گیانی لەدەست داوە و هیچ ئاسەوارێکی لێدان و ئەشکنجەدان بەسەر لاشەکەیەوە نییە."

 

هەر ئەمڕۆ زانا عەلی، برای زیرەک عەلی بە رووداوی گوت: "شەوی دووشەممە زیرەک ماتۆڕەکەی راگرتووە؛ نازانم لە پێش هۆتێل یان کوێ بووە، بەڵام دەزانم لەسەر راگرتنی ماتۆڕەکەی لەگەڵ چەند کەسێک تووشی دەمەقاڵی بووە و پێیانگوتووە ماتۆڕەکەت لابە و ئەویش پێیگوتوون پەیوەندییەکی تەلەفۆنیم لەگەڵە. لەسەر ئەو بابەتە بووەتە دەمەقاڵێیان. دوای ئەوە بە ساخی بردراوەتە ئاسایشی هەولێر و بە مردوویی گەیێندراوەتە دادپزیشکی هەولێر. سەردانی نەخۆشخانەم کرد و تەرمی براکەم بینی و شوێنەواری ئەشکەنجە بە جەستەیەوە دیار بوو"

 

زیرەک عەلی، خێزاندار بووە و باوکی سێ منداڵە، باوکی شەهیدی یەکێتیی نیشتمانیی کوردستانە، بۆیە ئەمڕۆ مەجید محەممەد ئەمین، بەرپرسی مەڵبەندی هەولێری یەکێتی لە کۆنفرانسێکی رۆژنامەڤانیدا رایگەیاند: "روونکردنەوەمان لە ئەنجوومەنی دادوەری، سەرۆکایەتیی داواکاری گشتی و وەزارەتی ناوخۆی هەرێمی کوردستان دەوێت کە بەرپرسیارێتی مەدەنی و ئەخلاقییان لەسەرە بۆ بەدیارخستنی هۆکاری مردنی زیرەک عەلی و هۆکاری گرتنەکەی."

 

لە بەشێکی روونکردنەوەکەی ئاسایشدا هاتووە، "وێڕای ئەوەی ئێمە وەک بەڕێوەبەرایەتیی ئاسایشی هەولێر، ئامادەین هاوکاریی تەواوی خانەوادەی کۆچکرد و هەر لایەنێک و رێکخراوەکانی کۆمەڵگەی مەدەنی بکەین، ئەگەر بیانەوێت بەشداریی پرۆسەی ئەنجامی لێکۆڵینەوەکان بکەن، لە چۆنیەتیی گیان لەدەستدانی کۆچکردوو." دەشڵێت، "بەڵام بەداخەوە چەند کەناڵێكی راگەیاندن و لایەنێک، دەیانەوێت کەیسی گیان لەدەستدانی ئەم هاووڵاتییە بۆ مەرامی تایبەتیی خۆیان بەكاربهێنن و تۆمەتی بێ بنەما و دوور لە راستی بڵاودەکەنەوە، بەبێ ئەوەی راستی و درووستیی رووداوەکان وەک خۆی بزانن."

 

ئاسایشی هەولێر داوا لە حیزب و لایەنە سیاسییەکان دەكات کە بەبێ بوونی بەڵگە، "هیچ زانیارییەکی نادروست لەپێناو بەرژەوەندیی تەسکی حیزبایەتی بڵاونەکەنەوە و پێش پرۆسەی ئەنجامی لێکۆڵینەوەکان نەکەون و هەرداواکارییەکیان هەیە بە رێگەی داداگەوە دەتوانن پێشکێشی بکەن و بەرگریی نەکەن لە ئەندامەکانیان کە کارێکی نایاسایی ئەنجام دەدەن، چونکە ئارامی و ئاسایشی شاری هەولێر ئەرکی سەرشانی هەموو لایەکمانە، بە پێچەوانەوە هەر کەسێک کارێکی نایاسایی ئەنجام بدات، بە ئەرکی سەرشانی خۆمانی دەزانین رووبەڕووی یاسای بکەینەوە."

 

ئاسایشی هەولێر باس لەوە دەکات کە "ئەو تۆمەتانە"ی ئاراستەیان دەکرێت، ساردیان ناکاتەوە و دەشڵێت، "بەڵكو بە پێچەوانەوە مكوڕترمان دەکات لە جێبەجێکردنی ئەرکەکانمان، چونکە پارێزگاریكردن لە سەروماڵی هاووڵاتییان و دانیشتووانی بەڕێزی شاری هەولێر و دەوروبەری، بە ئەركی سەرشانی خۆمان دەزانین، لەم پێناوەشدا بەبێ هیچ جیاوازییەك یاسا لەسەر هەموو تاکێکی كۆمەڵگەدا جێبەجێ دەكرێت و هیچ کەسێکیش لە سەرووی یاساوە نییە."